Дагъустандин Докъузпара райондин Мискискар хуьруьн кьилихъ галай къадим сурарай жагъанвай, араб чIалал къелемдиз къачунвай ктабрин арада винел «Мискинжи» кхьенвай хронографни ава. Араб чIалан пешекарри им гзаф къиметлу тарихдин чешме тирди ачухарнава. ХVIII виш йисан кьвед лагьай паюна араб чIалал кхьенвай и кIватIалда лезгийринни Надир шагьдин кьушунрин арада кьиле фейи женгерикай, Мискискар хуьруьн кьилел атай мусибатрикай, лакви гьаким Сурхай хандин лезгийрал гьужум авуникай икьван гагьди винел акъат тавунвай делилар ава.