Ötən əsrin 60-70-ci illərində Dağıstanın ləzgi rayonlarının ərazisində 88 növ heyvan, 130 növ quş, 40 növ sürünən heyvanlar olduğu qeydə alınmışdır. Son 70 il ərzində 15 növ heyvan, 40 növ quş, 20 növ həşərat SSRİ-nin və Rusiyanın Qırmızı kitabına düşüb. Samur meşələrinin ərazisi dörd dəfə azalıb. Buranın bitki və heyvanat aləminə yüz milyard manatlarla ziyan vurulub. Bütün bunlar yerli əhalidə böyük narahatlıq doğurur.
Vaxtilə SSRİ hökuməti milli parka çevirdiyi Samur meşələrinin 7,1 min hektar ərazisini qorumaq üçün qərar çıxarmışdı. Təəssüf ki, həmin qərar yerinə yetirilmədi. Heç kimdən kömək almayacağını hiss edən yerli əhali Samur meşələrini qorumaq üçün təbiətsevərləri bu işə cəlb etməyi qərara alıb.
