30 йисуз лезги халкьдин уьмуьрда чIехи роль къугъвай, хайи чIал хуьн ва вилик тухун патал датIана женг чIугур, чи тарихдикай, медениятдикай, сейли ксарикай, халкьдихъ къалабулух кутазвай месэлайрикай кхьей, халкьдин мефт, адан мез хьайи «Самурдин» юбилейдилай са шумуд югъ вилик кIелдайбуру хъсан савкьват къачуна. Эхиримжи 25 йисуз газетдиз регьбервал гайи, са патахъайни куьмек авачиз ам вичин пулунин такьатралди чапдай акъудай, вири дуьньядин лезгийрин рикI алай печатдин органдиз элкъуьрай шаир-журналист Седакъет Керимовадин кIелдайбуруз газетдин тарихдикай, ада фейи рекьикай, редакциядин четинвилерикайни агалкьунрикай чирвилер гузвай «Самур» 30» тIвар алай ктаб чапдай акъатна.

Кьве чIалал – лезги ва азербайжан чIаларал акъуднавай ктабда гьа са вахтунда «Самурдин» дустарикай, адан таъсиб чIугвазвайбурукай, мухбиррикай, газетди къарагъарнавай месэлайрикай ихтилатнава.

Бакудин «Элм ва тегьсил» чапханади ранглуз, иер кIалубда аваз басма авунвай ктабдин редактор Муьзеффер Меликмамедов я.