30 il ləzgi xalqının həyatında önəmli rol oynamış, doğma dili qoruyub saxlamaq və inkişaf etdirmək uğrunda mübarizə aparmış, tariximiz, mədəniyyətimiz, məşhur şəxsiyyətlərimiz və xalqı narahat edən məsələlər haqqında yazmış, xalqın dilinə və beyninə çevrilmiş “Samur”un yubileyi ərəfəsində oxucular gözəl hədiyyə almışlar. Son 25 il ərzində bu mətbu orqana rəhbərlik edərək, heç yerdən kömək almadığına görə öz şəxsi vəsaiti hesabına qəzet çap etmiş, “Samur”u bütün dünya ləzgilərinin sevimli mətbu orqanına çevirmiş şair-jurnalist Sədaqət Kərimovanın “Samur-30” adlı kitabı işıq üzü görmüşdür.
İki dildə – ləzgi və Azərbaycan dillərində çapdan çıxmış kitabda qəzetin tarixindən, onun keçdiyi keşməkeşli yoldan, redaksiyanın üzləşdiyi çətinliklərdən, uğurlarından, “Samur”un dostlarından, təəssübkeşlərindən, müxbirlərindən, qəzetin qaldırdığı məsələlərdən ətraflı söhbət açılmışdır.
Bakının “Elm və təhsil” nəşriyyatı tərəfindən rəngli və nəfis tərtibatla çap olunmuş kitabın redaktoru Müzəffər Məlikməmmədovdur.
