Алай йисан 6-февралдиз, югъ ахъа тахьанмаз Туьркиядин Кагьраманмараш шегьерда 7,4 баллдин къуват авай залзала хьана. Залзалади Гьатай, Къазиантеп, Османийе, Адыяман, Адана, Малатя, Шанлыурфа, Диярбекир ва Килис шегьеррихъни зарар хкIурна, инсанар телеф хьана, кIвалер чкIана. Гьукуматди кьуд лагьай дережадин къалабулухдин сигнал гана. Уьлкведиз вири дуьньядин куьмекдин игьтияж авайди малумарна. Залзаладикай 284 кас телеф хьанвайди, 2383 касдал херер хьанвайди, 1700-елай гзаф дараматар чкIанвайди малумарнава. Виридуьньядин Къизилдин Хаш Комитетдин Туьркиядин отделдин кьил Керем Кыныка уьлкведин вири ватандашриз иви це лагьана эвер ганва.
Къе Туьркиядихъ галаз санал Сириядани хьанвай залзаладин нетижада 200-елай гзаф инсанар кьенвайди винел акъатнава. Алай вахтунда залзала хьанвай чкайра телеф хьанвайбурун кьадар къвердавай пара жезвайди къалурзава.
Туьркияда ва Сирияда хьанвай залзалайри Ливандиз, Фелестиндиз ва Кипрдизни таъсирнава.
Уьлкведин рагъэкъечIдай ва кьибле-рагъэкъечIдай зонайра кьиле фенвай залзалайрин эпицентр Къагьраманмарашдин Пазаржык магьал я. Залзала чилин 7 километр деринвиле хьанва.
Къагьраманмарашдин залзаладилай кьулухъ гьасятда Къазиантеп Нурдагинда 6,4 баллдин къуват авай залзала хьанва.
Президент Илгьам Алиеван тапшуругъдалди Азербайжандин талукь министерстводин 370 касдикай ибарат команда Туьркиядиз ракъурнава. Сифте куьмек паталди пунаяр, мес-къуьж, дарманар ва медицинадин маса герек тир затIар рекье тунва.
Залзаладикай телеф хьайибуруз Аллагьди рагьмет авурай! Хирер алайбуруз Аллагьди мергьямет къалуррай! КIвалер-къар амачиз амукьнавайбуруз Аллагьди ва адан регьимлу бендейри куьмек гурай! Аллагьди сабур гурай!
