Ürəkaçan bir xəbər almışıq. Bu ilin avqustun 2-də Azərbaycan Yazıçılar Birliyinin üzvləri olan, Azərbaycan və ləzgi dillərində yazdıqları şeirlərlə oxucuların hörmətini qazanmış qəbələli beş şair “Söz” adlı ədəbi birlik yaratmışdır. Birliyə hələlik beş nəfər: Qərib Hüseynov, Cəlil Xeyirbəy, Qoşqar Qaraçaylı, Abbas Qəmərvanlı və Zamiq Ziyadrin daxildir.
Birliyin əsas məqsədi ləzgi və Azərbaycan dillərində yazılan əsərləri, hər iki dilə edilən tərcümələri müzakirə etməkdir. “Söz”u yaradanlar gələcəkdə Qəbələnin, Oğuzun və İsmayıllının Azərbaycan və ləzgi dillərində yazan qələm sahiblərini, ümumiyyətlə, bölgənin yaradıcı qüvvələrini birliyə cəlb etmək niyyətindədir. Dövlət dilinə və ana dilinə böyük məhəbbətlə yaradılmış birliyin rəhbəri Qərib Hüseynov seçilmişdir.
