Алатай йисан 26-декабрдиз Бакудин Жегьил Тамашачийрин Театрда Азербайжандин лезгийрин республикадин газет тир «Самурдин» 30 йисан юбилей кьиле фена.

Газетдин кьилин редактор, вичин уьмуьрдин 25 йис «Самур» газет акъудиз серф авур шаир-журналист Седакъет Керимовади газетди фейи рекьикай малумат гана. Сифте яз 1992-йисуз акъатай газетдин сад лагьай редактор Фейруз Беделов хьана. Ада а вахтунда гьукуматди ва кьилди ксари пулунин такьатралди куьмек гузвай «Самурдин» 24 нумра акъудна. Гуьгъуьнлай газетдин редактор хьайи искусствойрин илимрин доктор Нуреддин Гьабибова кьериз-цIаруз «Самурдин» 21 нумра чапдай акъуднай.

1997-йисалай гьукуматди газетдиз куьмек ганач ва ам агал жедай гьалдиз атана. Ихьтин вахтунда редакторвиле тайин хьайи С.Керимовади лезги чIалал сад лагьай республикадин газет тир «Самур» 25 йисуз вичин пулунин такьатралди чапдай акъудна. Ада шаир-журналист Муьзеффер Меликмамедовахъ галаз санал газет хуьн ва вири дуьньядин лезгийрин рикI алай печатдин органдиз элкъуьрун патал гзафни-гзаф алахъунар авуна.

С. Керимовади гзаф йисара вичихъ галаз санал кIвалахай газетдин редактордин заместитель Муьзеффер Меликмамедов, техникадин рекьяй жавабдар директор Муьбариз Азизов, компьютерризни принтерриз жавабдар Илгьам Фарманов, газетдин сад лагьай тартибчи Нуьсрет Къулиев, газетдин мухбирар тир Севда Азизова, Гуьлхар Гуьлиева, Роза Гьажимурадова, Айнур Новрузбегова, Анна Гьасанбегова сегьнедиз акъудна. Чкайрал газетдин мухбиррин постариз регьбервал гузвай Азербайжандин лайихлу духтур Нариман Османов, тIвар-ван авай интеллигент Бегьрам Залов, машгьур юрист Рауф Няметов, газет датIана рикI алаз теблигъзавай Оруж Оружов ва Незакет Керимова сегьнедиз акъатайла залда вирида капар ягъана. С.Керимовади мухбиррин постарин регьберрикай Шагьисмаил Исмаилова, Шагьнамаз Севзиханова, Маил Бабаханова ва Маида Ханметовади уьзуьрлу яз мярекатда иштиракзавач лагьана.

Ахпа Муьзеффер Меликмамедов газетди фейи залан ва лайихлу рекьикай, 25 йисан къене редакциядал гьалтай четинвилерикай рахана. «Самур» Лезги Милли Медени Меркездин кьил Имран Рзаева, Бакудин Мултикультурализмдин Меркездин кьил Реван Гьасанова, КцIар райондин Гьейдар Алиеван Меркездин кьил Нева Абдурагьмановади, гьа райондин Мучугъ хуьруьн мектебдин муаллим Незифе Къафлановади газетдикай чпин рикIин гафар лагьана. Мярекатда Дагъустан Республикадин Азербайжанда авай векилханадин жавабдар кIвалахдар Людмила Къазиевади Дагъустандин Гьукуматдин кьил Абдулмуслимов Абдулмуслимова ва Дагъустандин информациядин министр Энрик Муслимова «Самур» газетдин редакциядиз ракъурай тебрикар кIелна.

Мярекат гзаф гурлудаказ кьиле фена. 40 жегьилди иштиракзавай флешмобда «Самурдикай» шиир кIелна. Решад Ибрагьимова ва Эльвина Гьейдаровади «Самурдикай мани» лагьайла залда ацукьнавайбуру яргъалди капар ягъана. Жавагьир Абдуловади ва Роза Гьажимурадовади лагьай манийри, зурба устад Шуьрбет Рзакъулиева кларнетдал, Ашукь Нуьсретан хтул Нуьсрета чуьнгуьрдал ягъай макьамри мярекат генани гурлу авуна. А йифиз вирибур лезги эстрададиз цIийи гъед атанвайдан шагьид хьана. Ам вичин 10 йис хьанвай Сария тир. Ада вичин диде Эльвина Гьейдаровадихъ галаз санал дидед чIалаз талукьарнавай композиция гзаф устадвилелди тамашачийрив агакьарна.

«Самур» газетдин редактор пародия авур гъвечIи актриса Зафина Мирзебеговади ва «Сувар» ансамблдин кьил Завир Нежефова санал кьилиз акъудай композицияни виридан рикIяй хьана.

Мярекатдилай вилик жегьил художник Эльвира Къулиевадин театрдин фойеда тешкилнавай выставкадиз вирибуру чIехи марагъдивди килигна.