Алай йисан 26-декабрдиз Магьачкъалада, тарихдин «Урусат – зи тарих» паркуна лезги шииратдин йикъаз талукьарнавай мярекат чи халкьдин сейли шаир, гьикаятчи, композитор, Бакуда лезги чIалал акъат-завай «Самур» газетдин кьилин редактор, кинорежиссер, Азербайжан Республикадин медениятдин лайихлу къуллугъчи Седакъет Къайинбеган руш Керимовадин юбилейдин мярекат кьиле фена. Ам лезгийрин милли медениятдин федеральный дережадин автономиядин (ФЛНКА) «Милли кIвачел акьалдарунин» фондунин куьмекдалди арадиз гъанвай. Къейд ийин хьи, и юбилейдин няни 2023-йисуз лезги халкьдин медениятдин уьмуьрда кьиле фейи кьетIен вакъиайрикай садаз элкъвена.
Лезги шииратдин йикъаз талукьарнавай мярекатдин кьилин игит Седакъет Керимова тиртIани, анал алатай йисуз юбилеяр къейд авур лезги халкьдин са шумуд шаир – Нуреддин Шерифов (140 йис), Хуьруьг Тагьир (130 йис), ШагьЭмир Мурадов (110 йис), Шихнесир Къафланов (100 йис), Сажидин Саидгьасанов (90 йис) ва Мердали Жалиловни (80 йис) рикIел хкана. Абурун портретар залдин сегьнеда туькIуьрнавай чIехи баннердал акъуднавай. Гьа шаиррин шиирар Магьачкъаладин 11-гимназияда лезги чIалан муаллим Индира Амахановади тарс гузвай аялрин са кIеретIди гзаф фасагьатдиз кIелна.
Межлис кьиле тухузвай Гуьллер Камиловадини Владик Батманова юбилейдин мярекат ачухун патал ФЛНКА-дин регьбер Васиф Гьасановаз сегьнедиз эверна. Ада юбилярдив ва залда кIватI хьанвайбурув миллетрин алакъайрин жигьетдай Россиядин Президентдин патав вай Советдик квай Ариф Керимован патай тебрикдин гафар агакьарна.
Гуьгъуьнлай мярекатдиз атанвай гьуьрметлу мугьманриз гаф гана. Абурун арада Дагъустандин Халкьдин Собранидин депутат Имам Яралиев, РД-дин Ичтимаи палатадин кьил Азизбег Черкесов, РД-дин Гьукуматдин Председателдин заместитель Нариман Абдулмуталибов, РД-дин милли сиясатдин ва диндин крарин рекьяй министр Энрик Муслимов, Россиядин халкьарин кIвалин директордин меслятчи Тимур Мугьамедов, ДГПУ-дин професор Шайдабег Мирзоев, и цIарарин автор – Дагъустандин Кхьирагрин КIватIалдин секретарь ва лезги эдебиятдин хилен регьбер, Дагъустандин халкьдин шаир Хуьруьг Тагьиран хва, таржумачи-шаир Максим Алимов ва масабур авай.
Мярекатдин мугьманрикай сад тир, Волгограддай и мярекатдиз атанвай Гьилал Аскерова вичин чIехи буба, лезгийрин тIвар-ван авай шаир, Азербайжанда сифте яз лезги чIалал газет арадал гъайи Нуреддин Шерифовакай кхьена чапдай акъуднавай ктабдикай ихтилатна. Седакъет Керимовадикай рахадайла, ада ам фадлай «Дагъустандин халкьдин шаир» тIвар гуниз лайихлу тирди къейдна ва РД-дин кхьирагрин Союздивай, республикадин гьукуматда кIвалахзавай чи халкьдин векилривай и месэла гьялунин карда куьмек гун тIалабна.
РФ-дин лайихлу артист, Дагъустандин халкьдин артист, СтIал Сулейманан тIварунихъ галай Лезги театрдин актер Абдуллагь Гьабибова Седакъет Керимовадин «Лезгинкадал илига» шиир эсерлувилелди кIелна. Адахъ галаз санал сегьнедиз экъечIай Лезги театрдин директор Динара Эминовади милли театрдин коллективдин патай С.Керимовадиз юбилей мубаракна.
Мярекат гафарни макьамар С.Керимовадиз махсус тир манийри мадни гурлу авуна. Манияр тамамарайбурун арада Дагъустандин халкьдин артист Роза Максумова, Азербайжандай атанвай Решад Ибрагьимов, Жавагьир Абдулова, Эльвина Гьейдарова, Роза Гьажимурадова ва Агьмед Къурбанов авай.
Мугьманри багъишнавай цуькверин юкьва авай Седакъет Керимовади, вичиз хайи югъ тебрикиз атайбуруз рикIин сидкьидай сагърай лагьана. Ада гьакIни мярекат арадиз гъуник чIехи пай кутур вирибуруз кьилди сагърай лагьана.
Гуьгъуьнлай ада мярекатда иштиракайбурун са кьадар суалризни жавабар гана. Къведай йисарин планриз ва лезги шииратдин гележегдиз талукь суалриз жаваб яз, С.Керимовади лагьана:
– Етим Эмина, СтIал Сулеймана, Хуьруьг Тагьира ва лезги поэзиядин маса устадри шииратдин багъда акIурнавай къелемри, абурун цIирери виниз тир бегьер тагана жедани? Зун чIалахъ я хьи, чи эдебиятдиз атанвай жегьилрихъ зурба агалкьунар жеда…
С.Керимовадин «Чун лекьер я» шиирдикай мярекатдал гзафбуру чпин фикирар лагьана. Лекь лагьайла, фикирдиз цава азаддиз лув гузвай къуш къвезва. Амма шаирдин кьилин фикир инсан тек са къушрав гекъигун туш. Ина ихтилат къилихрикай физва, лекьрен къамат чи халкьдиз хас ярж, лишан я. Мисал яз, лиф – ислягьвал, къуьр – кичIевал, сикI – амалдарвал… Лекь лагьайтIа, кьегьалвал я.
Фикир виридалайни гзаф шиирдин эхиримжи кьве цIарцIи желбзава: «Чун лекьер хьиз рекьин герек!» КIелзавайда фагьумзава: лекь гьикI рекьизва? Лекь халис итим хьиз рекьизва, итим – халис лекь хьиз.
* * *
Къейд ийин хьи, Седакъет Керимовадин юбилейдиз талукьарнавай мярекатар 27-декабрдиз СтIал Сулейманан районда давам хьана. Кьасумхуьрел, И.Тагьирован тIварцIихъ галай медениятдин дараматда шаирдин гьуьрметдай чIехи мярекат кьиле фена. Ана СтIал Сулейманан райондин кьил Саид Темирханова, ФЛНКА-дин кьил Васиф Гьсанова, чкадин администрациядин, интеллигенциядин векилри, шаирри, гьикаятчийри, муаллимри, милли эдебиятдал рикI алай ватанэгьлийри иштиракна.
Мярекатдал рахайбуру Седакъет Керимовадин уьмуьрдин ва яратмишунрин рекьикай чпин фикирар лагьана, адан шиирар кIелна, манияр лагьана.
