1830-йисуз урусрин кьушунри Жар-Балакен кьиляй-кьилди пацук кутуна ахпа Дагъустандин бязи вилаятар чапхунин кьетӀна. Генерал Паскевича Балакендай Дагъустандиз физвай рекьер кьуна. 1830-йисан февралдиз урус кьушунри Балакендин вири хуьрер муьтӀуьгъарна.

Июндин вацра Дагъустандин лезгияр жарвийриз куьмек гуз атана. 21-июндиз лезгийринни урусрин арада дяве къарагъна. Кьве патайни вишералди инсанар гьелек хьана.

1830-йисан 12-сентябрдиз Дагъустандай Гьемзет бег кьиле аваз 2 агъзур лезги атана. Чкадин агьалийри чпин къуватар лезгийрихъ галаз сад авуна. Лезгийри са вацра вири рекьер элкъуьрна кьуна урусрин кьушунар цӀарцӀе туна. 15-октябрдиз кьиле фейи ягъунра лезгияр гъалиб хьана. Ингье са кьадар вахтар алатайла чкадин агьалийрин чпин арада наразивилер гатӀунна. Идакай менфят къачур урус пачагьдин генералри лезгийрин чӀехибурухъ галаз ислягьвилин икьрар кутӀунна. Дагъустандай атай куьмекар 10-ноябрдиз Закъаталадай хъфена. Идалай гуьгъуьниз – 14-ноябрдиз урусри Балакендиз гьужумна чкадин агьалияр кукӀварна, бунтуниз регьбервал гайибурукай 32 кас дустагъна.