Вичин иервилир суракьар вириниз чкIанвай Гуьлсуьм бике Дагъустандин гилан СтIал Сулейман райондин КIварчагърин хуьряй тир. Къарахаг бегдин руш тир ам бубадин гьукумдалди Куьре ханлухдин гьаким Аслан хандиз гъуьлуьз фенай. Са кьадар вахтундилай гьакимди вичин дуьнья дегишарнай. Аслан хан кьейила адан рухваяр Мегьамед Мирзени Мегьамед Нуцал гьеле гъвечIи аялар тирвиляй ханлух Гуьлсуьм бикеди идара ийиз хьанай.

Чи сейли алим Гъалиб Садыкъиди малумат гайивал, Гуьлсуьм бике вичихъ гзаф алакьунар авай хан тир. Ада са шумуд хуьре мектебар ва мискIинар эцигиз тунай. Налогрин кьадар тIимиларнай. Хуьруьнвийриз цанар цадай чилер ганай. Ам вириниз адалатлу хан хьиз сейли хьанай.

Гъалиб Садыкъиди Гуьлсуьм бикедин алакьунрикай хабар гузвай са документ винел акъуднай. А документда къалурнавайвал, Дагъустандай Мекке шегьердиз Гьаждал физвай Дагъвийрал Дамаск шегьердивай кьибледихъ са кьадар мензилда къарачи арабрин кIеретIди гьужумнай ва абурув гвай шейэр къакъуднай. Дагъвийри Дамаскдин гьакимдиз гьикьван арза-ферзе авунатIани хийир хьаначир. Эхирни дагъвийри лезги хан Гуьлсуьм бикедиз гьанай шикаят ракъурнай. Гуьлсуьм бикеди Дамаскдин гьукумдарривай дагъвийриз куьмек гун тIалабнай ва адан тIалабун кьилиз акъатнай.