Урусатди Къафкъаздиз кIвач эцигай кумазни лезгийри урус пачагьдин гьукуматдин аксина женг чIугваз, гъулгъуладик кьил кутаз гатIунна. Халкьар пацук кутаз алахъзавай урус гьукуматди лезгийрин чилер масанай куьч хьана атанвайбуруз гузвай. Санлай 60 йисуз лезгийри урус пачагьдин гьукуматдин аксина женг чIугуна.

***

Лезгийрин гьужумрин вилик пад кьун паталди Пётра Моллакенд ва Юкьван Богъам хуьрерин патав кьве кIеле эцигиз тунай.

***

Лезгийрин басрухриз таб гуз тежез Барятинскийди Дагъустанда гзаф кIелеяр ва къаравулханаяр эцигиз тунай.

***

Лезгийри Иран гьукуматдин аксина бунт къарагъарна Мегьди хан (Надир шагьди тайинарнавай Ширвандин кьил) яна кьенай ва адан кьушун кукIварнай. Надир шагьди лезгийрин бунтуникай вичи Гьиндистандихъ галаз дяве тухудайла хабар кьунай. Ада Гуржистандин гьаким Эмир Аслан хандивай лезгийриз жаза гун ва и кар патал Къафкъаздиз мад кьве полк аскерар ракъурун тIалабнай.

Решид бег Исмаилован «Азербайжандин тарих» (1923) ктабдай