АЛИНА МУРАДАЛИЕВА

Кьил акъуддай ксари хиве кьазвайвал, эхиримжи 15 йисан вахтунда дуьньядин спортда виридалайни аламатдин вакъиа лезги тават Алина Мурадалиевадихъ галаз алакъалу я. Са береда Дагъустандин Миграгъ хуьряй Москвадиз куьч хьайила адан хайибурун виридалайни чIехи мурад чпин веледрив и шегьерда кIелиз тун, абуру институтар акьалтIарна ина кIвалахал акъвазай югъ вилералди акун тир. Ингье гьеле институтдик экечIдалди веледри чпин агалкьунралди и зегьметчи, чина нур авай лезги диде-бубадин рикIера бахтлувилин эквер куькIуьрна абур шадарна.

Абурун 7-синифда кIелзавай руш Алина 2010-йисуз универсал акъажунрай дуьньядин чемпион хьана. И вини дережадив агакьдалди ада Россиядин ва Европадин чемпионвилин тIварар къачунай. Акъажунра садрани магълуб тахьай Алина эхирни «къацу чIулунин» иеси хьана.

Вичихъ икьван чIехи агалкьунар авай лезги руша садрани такабурвал авунач. Спортдал гзаф рикI алаз, датIана мешкъер ийиз генани кьакьан кукIушар рам авуна, халкьдихъ дамах кутуна. Вичин 17 яшар жедалди 20-далай гзаф къизилдин медалар къачур лезги таватдин тIвар дуьньядин виридалайни гужлу спортсменрин сиягьда гьатнава. Адан агалкьунар икьван гагьди садавайни тикрар ийиз хьанвач.

ГУЬЛСЕЛЕМ ГЬАМИДОВА

Вич 1928-йисуз Бакуда лезги фяледин хизанда дидедиз хьайи Гьамидова Гуьлсенем Казиман руш вири СССР-диз сейли тир. Азербайжандин Халкьдин Майишатдин Институт акьалтIарай ада гуьгъуьнлай Москвада Партиядин Кьилин Мектебда кIелнай.

Гьукуматдин органра кIвалахай Г.Гьамидовади халкьдин патай гьуьрмет къазанмишнай. Алатай асирдин 50-90-йисара жавабдар къуллугъар кьилиз акъудай ада Ахцегьин халкьдин гуьзчивал кьиле тухузвай идарадиз регьбервал ганай, райкомдин сад лагьай секретарь хьиз ина гегьенш абадвилерин бине кутунай. Адан регьбервилик кваз райондин хуьруьн майишат гзаф вилик фена, Ахцегь эцигунрин майдандиз элкъвена.

Алакьунар авай лезги таватди гуьгъуьнлай Дагъустандин Вилаятдин Партиядин Комитетдин отделдиз регьбервал гана. Ина са шумуд йисуз кIвалахай адакай Дагъустандин агьалияр уьмуьрдин такьатралди таъминардай министр хьана. И рекьяй ада къазанмишай агалкьунрикай Россиядин газетри макъалаяр чапна. Министрвиле кIвалахдайла чешне къалурай Г.Гьамидова Зегьметдин Яру Пайдахдин Ордендиз ва Гьуьрметдин Лишандин Ордендиз лайихлу хьана. Ам са шумудра Дагъустандин депутатвиле хкяна. Гуьлсенем Гьамидовадин тIвар «СССР-дин регьбер дишегьлияр» ктабда гьатнава.

ШАНИ ИСМАИЛОВА

2008-йисан 30-декабрдиз «Дагестанская правда» газетди адакай кхьенай: «30 йиса аваз докторвилин диссертация хвейи и алимди вичин илимдин кIвалахралди неинки Дагъустандин, гьакIни Россиядин экономикадик зурба пай кутунва.

Дагъустандин Гьукуматдин Техникадин Университетда кафедрадиз регьбервал гузвай профессор Исмаилова Шани Тагьиран рушан илимдин кIвалахри ва илимдин теклифри гьукуматдин хазинадиз миллион манатралди къазанжи гъанва». Дагъустандин виридалайни жегьил илимрин доктор тир Шани Исмаиловади са шумудра вири Россиядин конкурсра гъалибвал къазанмишна. 2009-йисуз ам «Экономикадин» номинациядай виридалайни хъсан илимдин ктаб конкурсдин лауреат хьана ва и карди адаз РФ-дин илимдин ичтимаиятдин патай чIехи гьуьрмет гъана.

Ш.Исмаиловадин илимдин кIвалахар гьам Россияда, гьамни къецепатан уьлквейра чап жезва