Веледов Энжем Азеран хва 1986-йисан 24-июлдиз КIцар райондин Манкъулидхуьре дидедиз хьана. КцIар шегьердин 3-нумрадин юкьван мектеб акъалтIарна Азербайжандин Международный Универститетдин Фармоцевтика факультедик экечIна. 2011-йисалай КцIарин «Зейтун» аптекада провизорвиле кIвалахзава. Лезги ва азербайжан чIаларал шиирар кхьизва.

        БУБАДИЗ

Аял чIавар ви къужахда фена зи,

Заз ахварай аквазма вун йифериз.

Вун къакъатна. Хияларни кьена зи,

Элкъвена хьи закай катай лифериз.

Ви гъил акьур гьар ракIарин, дакIардин

Зи гъилера квахь тийидай гел ама.

«Чанта кIватIа» – лугьузвай а ви ванцин

Зи вилера хвешивилин шел ама.

                   МЕЗ АВА

Мез ава хьи, херда рикIел гапурд хьиз,

РикI тIарарда, саки кьве чIук авурд хьиз.

Мез ава хьи, гъуьлягъ мукай акъудда,

РикIе авай вири дердер алудда.

Мез ава хьи, ам агъу я, туькьуьл я,

Ахьтин рикIе хияларни кагьул я.

Мез ава хьи, рикI ашкъидив ацIурда,

ХъуьтIуьн цикIиз дагъда муркIар цIурурда.

Мез ава хьи, ислягьвилин лишан я,

Сиве ширин мез авайди инсан я...