Вичихъ алакьунар авай жегьил къелем-эгьли Эсмира Магьмудова (Бейбутова) 1994-йисуз КцIар райондин Хуьрелрин хуьре дидедиз хьана. Хайи хуьре юкьван мектеб акьалтIарна, хизан туькIуьрна КцIариз куьч хьайи ам кьве веледдин диде я. Лезги поэзиядал гзаф рикI алай адан сифте шиирар «Самур» газетда чап хьана.

             ИЕР Я

Кlвале чими эквер хьайла хъсан я,
Мекьи юкъуз къвайи марфни иер я.
Хвешилив, бахтлувилив туькlуьрай, 
Рикlяй атай гьар са гафни иер я. 

Гьавадивай хаз жедани кефияр?
Гатуз цуьквер, хъуьтIуьз живер иер я.
Экуьн кьиляй ракъин нурни чиг алай
Хважамжамдин яргъи кифер иер я.

Зул атайла рикI чуькьуьдач, шад жеда,
Чандал къведа цIийи цIарар шииррин.
ЦIару тамухъ ялда рикIи, фин лугьуз,
Гьейранарда вун гамари пешерин.

Гьар са касдин рикlе чими гад хьурай,
ТIебиатдик къайи кьуьдни кваз жеда.
Чи гуьгьуьлар рагъ акьуна шад хьурай,
Хар къвайтIани, чил иервал гваз жеда.
 

      МАД СА ШИИР

Зулун йикъар алукьнава марфар кваз,
РикIе гафар кlурукlар хьиз дакIвазва.
Зи хиялри къушари хьиз рикI алаз,
Муг туькIуьриз гьазурвилер аквазва.

Зулун цуьквер ахъа жезва рикIе зи,
Мад са шиир авахьзава булах хьиз.
Акахьнавай гьар жуьредин пешерал,
Чиг чикIизва перишанвал алахиз.

На зи хатур хамир мадни нагагьдай,
Зи шиирдин цуьквер алахь тавурай.
Шадвилерихъ цIигел хьанвай зи рикIиз,
Мад садрани хажалатар такурай.