Исятда дуьньяда 5621 чIал ва нугъат ава. 500 чIал тамамдиз тупIалай авунва. Абурукай 250 эдебият чIалар я. 1400 чIал квахьзавайбур яз гьисабзава. Пудай кьве пай чIаларал кхьинар авач. 3 миллион агьалияр авай Папуа-ЦIийи Гвинея гьукуматда 1010 чIал кардик ква.

***

Дуьньяда виридалайни гзаф 13 чIалакай менфят къачузва. А чIаларал 65 уьлкведин агьалияр рахазва. Дуьньядиз виридалайни гзаф чкIанвай чIал китай чIал я. Гьинд чIал 490 миллион агьалийрин, испан чIал 399 миллион инсанрин, ингилис чIал 335 миллион нефердин хайи чIал я. Идалай гуьгъуьниз 203 миллион нефердин диде чIал португал чIал, 189 миллион инсанрин дидед чIал бенгал чIал яз гьисабзава. 166 миллион агьалийрин хайи чIал урус чIал я.

***

Лезги, авар, дарги ва къумукь чIалар Дагъустандин виридалайни чIехи чIалар я. Ина годебрин чIалал 3000, ботлихдалди 1500, гинухдалди 400, хваршин чIалал 200 кас рахазва. Дагъустандин вири чIалари гьукуматдин статус къачунва. КIел-кхьин авай 14 чIал «титулдин халкьаринбур» яз гьисабзава. Гьавиляй Дагъустандин гербда лекьрен луварал алайди 14 цIакул, яни чIалан иесийрин ярж я.

***

Алай вахтунда Россиядин 180 халкьди 200 чIалакай менфят къачузва. И уьлкведин гзаф чIалар авай республикайрикай сад Дагъустан я. 70 миллетдин векилар яшамиш жезвай ина 32 чIалал рахазва. Абурукай 14 кхьинар авай, 18 кхьинар авачирбур я.