Къвердавай чпин яшайиш генани залан жезвай, гзаф магьрумвилер эхзавай, кашал гъанвай гьалариз таб гузвай Къуба уезддин агьалийри, иллаки лезгийри гьахъсузвилерин аксина 1917-йисан сифте йикъарилай женг чIугваз гатIумна. Гьа йисан июндин вацра КцIар волостдин Уьнуьгъ, Зинданмуругъ, ЧIакIар, Кузун хуьрерин агьалийри гъиле яракь кьуна къанунсузвилериз рехъ гузвай, чпиз кIандайвал ийизвай гьукуматдин органриз ихьтин крар арадай акъудун патал хабардарвал авуна. Идалай гъейри ЦIийихуьр ва Муьшкуьр хуьрерин агьалийри гьукуматдин векилар ва полисар чпин хуьрерай акъудна чукурна.
«Каспи» газет N 81, 1917-йисан 12-апрель

   1917-йисан апрелдиз Къуба уездда хуьруьнвийрин женгчивилин гьерекат генани гужлу хьана. Магьсулрин кьитвили, акьалтIай кесибвили, багьавили, яшайишдин заланвили хуьрерин агьалияр женг чIугваз мажбурнавай. Карточкадив гьар са касдиз 400 грамм фу гузвай. Дагъдин хуьрерин агьалияр лагьайтIа, адакай магьрум тир. Къуба Уезддин Продуктрин Комитетди вичин Девечидин, КцIарин ва Рустовдин отделар кардик кутунвайтIани, жемятрин гьалар къвердавай мадни пис жезвай.

   …КцIар волостдин Уьнуьгъ, Зинданмуругъ, ЧIакIар хуьрерин агьалийри датIана арза вугуз шикаят ийизвай ва гьукуматдин органриз кичIерарзавай…Губерниядин Продуктрин Комитетди фан патахъай КцIара гьатнавай гъулгъуладин вилик пад кьун Къуба Уезддин Продуктрин Комитетдин хиве вугана.
«Каспи» газет N82, 1917-йисан 14-апрель

   Къубадин фронтда хьиз, Худатин ва КцIарин фронтдани Советдин кьушунар магълуб хьана. И ягъунра большевикри гзаф аскерар квадарна. Душмандин (лезгийрин-ред) гъиле большевикрин 2 туп, 800 тупунин гуьлле, 4 пулемет, 10000 патрон, гзафни-гзаф яракьар, 2 фургъун недай-хъвадай затIар гьатна.
«Возрождение» газет N 86, 1918-йисан 1-май