Гьикl чlалахъ жен? Мурадри цуьк акъудзавай, агалкьунрин бегьер кlватlзавай береда уьмуьр кьатl хьайи Русланан кьиникь гьикl иливарин? Чина датlана хъвер авай, мукьва-кьилийрихъ ялай, хайи халкьдин харусенят кьакьанриз хкажун патал зурба алахъунар авур и зегьметдал кьару инсан квадарун залан дерт я.

1996-йисуз за Бакуда «Сувар» ансамбль туькlуьрайла сифте яз аниз эверай и жегьилди юкьван мектеб цlийиз куьтягьнавай. Гьа йисуз кьиле фейи сад лагьай концертда ада вичин манийралди залда авайбурухъ лезги руьгь кутунай. Гьа икl, Руслан Пирвердиев 15 йисуз «Суварин» рикl алай маничидиз ва лезги чlалан женгчидиз элкъвенай. Ада чlехи сегьнейрай вирибуруз хайи чlал кlанарнай. За гзаф йисара кьилди Руслан паталди кхьей «Шагь дагъдин цуьк», «Мехъер я», «Чан диде», «Баку» хьтин цlудралди манийри рикlер рам авунай. Гуьгъуьнлай Дагъустандиз куьч хьайи Русланан алакьунриз ана къимет ганай, ада «Дагъустандин лайихлу артист» гьуьрметдин тlвар къачунай.

Межлисрин абур тир Руслан. Лезги, азербайжан ва урус чlаларал фасагьатдиз рахадай, мярекатар гьа вичиз хас жуьреда марагълуз тухудай и кьегьал виридаз пара кlандай.

Эгь, лугьудай гафар гзаф ава, амма абурувай дуьньядилай фейиди элкъуьриз жедач. Чаз амукьдайди адакай хъсан рикlел хкунар я. Аллагьди рагьмет авурай вичиз!

Садра фейид мад элкъведач,

Авахьна вацl, яд элкlведач,

Хъуьтlуьн цикlиз гад элкъведач,

Шехьмир вилер, шехьмир эллер!