Играми редакция! Зи чIехи буба Дагъустандин Ахцегь райондай я. Ватандин ЧIехи дяведин вахтунда ам вичин хизанни галаз Магьачкъаладиз куьч хьанай. Ада заз гьамиша Ахцегьин тарифар ийидай. И мукьвара зун чIехи бубадин гафар рикIел хкана Ахцегь шегьердиз, анайни Кара-Куьре хуьруьз фена. И къадим хуьре авай тарихдин гуьмбетар акурла зун пагь атIана амукьна. Иллаки Х асирда эцигнавай мискIинди заз гзаф таъсирна. Магьачкъаладиз хтайла зун адан тарихар чириз алахъна ва чирни авуна. Гьавиляй за редакциядиз чар ракъурун къарардиз къачуна.

Кара-Куьре хуьре Х асирда эцигнавай мискIин Дагъустандин археологиядин къадим гуьмбетрикай сад я. Адан сифтегьан эцигунрикай амайди 6 дестек я. Абурун гьар садан кьакьанвал 3,6 метрдив агакьзава.  И кьуд пипIен дестекар чкадин  къванерикай эцигнава ва винел пад сувагънава. Сувагъдал набататрин, геометриядин фигурайрин ва чкадин акунрин нехишар атIанва.

Дестекрал алай араб кхьинар шумуд йис тир кIелиз тежез. Ахпа заз чир хьайивал, абур са шумуд йис инлай вилик чи машгьур алим, тарихдин илимрин доктор, профессор Амри Шихсаидова кIелна кьван. Ада кхьенвайвал, вири кхьинрин вини кьиле Къуръандай гафар ава: «Я Аллагьдихъ ягъайбур, Аллагьдикай кичIе хьухь ва къуватлу гаф лагь».

Кхьинрин юкьва ихьтин гафар ава: «Гьасанан хва Исгьакьа Аллагьдик умуд кутазва». Чи алимди им я мискIин эцигай устIардин ва я дестекрал сувагъар ва нехишар авур касдин тIвар я лагьанай.