Гьуьрметлу Мегьамед муаллим! Куьн хьтин зурба алакьунар авай шаир- журналист кьиле аваз акъудзавай «Лезги газетдалди» чна дамахзава. Куьне чlалахъ галаз алакъалу яз кьиле тухузвай проектри, жуван лезгияр хайи чlалав генани мукьувай агудун патал ийизвай алахъунри чак руьгь кутазва. Куьне кар алай месэлаяр гьялун патал лезги чIалал рикI алайбуруз куьмекарни гуз-ва. Гьавиляй за «Самур» газетдин чинрай квев жуван чар агакьарзава.
Зун – Бабаева Айтекин Наврузан руш Азербайжан Республикадин Къебеле райондин ЦIийи Дызахлы хуьряй я. 2002-йисуз Дагъустандин Гьукуматдин Университетдин Бакудин филиалдин Дагъустандин филологиядин факультетдик экечIай за 2008-йисуз кIелун кьилиз акъудна. 2008-йисалай 2016-йисал къведалди за хуьруьн юкьван мектебда лезги чIалан ва литературадин муаллимвиле кIвалахна. Ингье 2016-йисалай республикадин талукь министерстводи чна филиалди вугай дипломар къанундив кьазвайди яз гьисаб- завач лагьана ва зун муаллимвал акъвазаруниз мажбур хьана.
Алай вахтунда за мектебда аялрин организациядиз регьбервал гузва.Чи республикадин образованидин къанундив кьадайвал, кIвалах давамарун патал за министерстводив жуван аттестат вугана кIанзава. Аттестат лагьайтIа, ДГУ-дин архивда ава.
Авайвал лагьайтIа, заз аялриз дидед чIалан тарсар гуз кIанзава. Бес за гьа и кар паталди вад йисуз кIелна чIугур кьван зегьметар гьикI хьурай? Белки Квевай ДГУ-дин чIехибурухъ галаз рахана заз куьмек гуз жеда? Зун паталди и дуьньяда аялриз жуван дидед чIал чирунилай хъсан затIни авач. Гьуьрметлу Мегьамед муаллим! За квевай дидед чIалал гзафни-гзаф рикI алай са вахаз хьиз заз куьмек гун тIалабзава.
