Хьана кьван, хьанач кьван, иер чlулав вилер авай, шуьтруь рангунин са кал. Вучиз ятIани вич гуьчIуьз аквадай адаз. Марфадилай кьулухъ чилел кватl хьанвай рагъул ятарай вичин тан акурла кефияр чlур жедай гьайвандин. Кlекрен иер цlакулар, балкlандин яргъи фири, кацин таза хам акваз пехилвалдай ада. Вичин яргъи тум лагьайтlа, аквадай вил авачир адаз.

Калин тумуни инихъ-анихъ галтад жез, чан туьтуьниз гъидай гьайвандин. Вучайтlани чlалаз килигдачир ада.

Садра нехирдай хкведайла адан пелел са тlветl ацукьна. Кали гьикьван кьил юзурнатlани тlветlре адалай гъил къачунач. Кал къекъерай акъатна:

– Алат зи чандилай, я тlветl! Квал акатзва зак, эхиз жезвач.

– Алатдач. За ви пелел жуваз муг ийида, хъсан чими чка я.

– Ваз маса кар-кеспи авачни, я тlветl? Вучиз гьавалат хьанва вун зал?

Тlветlрен къилих чlуруди тир. Масадбурун кьарай атlуни кеф гудай адаз.

– Я кал, вун гуьчIуьда кьван вуч я! Вилер аку – ичер хьтин чIехибур, крчар аку – виже текъведай, гьеле а яргъи тум лугьузвач за, ви чlалаз килигзвачир.

Тlветlре ягъанатар авунивай адан вилерай накъвар авахьзавай.

Эхирни кализ маса гьайванривай куьмек кlан хьана. Ам кlвенкlве кацив агатна:

– Кац баха, тlветl чукуриз куьмек це заз.

Кациз тапацдив калин пелел алай тlветl ягъиз кlан хьана, ингье тlветl лув гана катна, са герендилай гьанал ахцукьна. Калин пелел кацин тапацрин гел аламукьна.

Фена кал кlекрен кьилив. Ада шел-хвал авуна кlекрез пелел алай тlветl къалурна.

– Исятда за а тlветl пашманарда, – лагьана кlекре вичин иер луварар ахъайна калин пелез кlуф яна. Калин кьиле тlал гьатна, кьуд патаз гьайвандин му-у-дин ван чкlана.

– Тlветl чукурун чlуьт рекьинлай четин кар тирди чидачни ваз? – лугьуз калихъ генани хъел кутазвай тlветlре.

– Вал алай чин вуч я? – хъел галаз лагьана кали, – акъваз садра, за ваз вуч ийидатIа килиг, – лагьана кал фена патав гвай тар галайнихъ. Адаз вичин кьил тарав гуьцIна пелел алай тlветl рекьиз кlанзавай, ингье тlветl элкъвена мад алай чкадал ахцукьна.

Вучда, гьикlда? Фена кал балкlандин кьилив. Кьакь хьиз калин пелел алкlанвай тlветl ван алаз хъуьрезвай.

– Ибур аку садра, са гъвечlи тlветlрен вягьтедай къвез жезвач, – лугьуз калин пелел къатадзавай ада. Тlветlрен гафари балкlандик хъел кутуна. Ада кlурар хкажна калин кьве вилин ара акl яна хьи, гьайвандин крчар каквана.

Калин ял кьуна. “Зун авай югъ аку, са гъвечlи тlветl чукуриз алакьзавач”, – лугьуз фикирар ийидайла садлагьана калин тум адан пелел акl гьалч хьана хьи, калин вилери цlапlрапlарна. Ам вичел хтайла тlветlрекай амайди са ламу гел тир. Калин хвешивилин и кьил, а кьил авачир. Тlветlни чандилай алатнавай, вичиз хъел къвезвай тумни бакара къвезвайдан гъавурда акьунвай ам. Гьа чlавалай кали вичин акунрин синихар хъувунач.