Авадан жезва
Дагъларин ценерив гвай Хив район эхиримжи йисара абад ва авадан жезва. Ина гзаф хийирлу кIвалахар кьиле физва. Газ агакьнавай хуьрерин кьадар къвердавай пара хьуни инсанар шадарзава. Районда рекьер гуьнгуьна хтуниз кьетIен фикир гузва. Хуьрера девирдив кьадай цIийи мектебар эцигзава. ЦIинитIа, Къванцига, Ляхла, ЦIийи Фригъа ва маса хуьрера цIийи мектебар кардик кутунва.
Райондин сергьятра са шумуд цIийи муьгъ эцигнава. Гила агьалияр гьа са вахтунда куьгьнебурухъни гелкъвезва, абур гъиляй вегьез тазвач. Куьгьне муькъвер гьам архитектурадин имаратар хьиз хуьн, гьамни инсанри менфят къачун патал арадиз хкизва.
Къулайвилер туькIуьрнава
Вириниз сейли лезги олигарх ва меценат Сулейман Керимова вичин бубадин хайи ватандин – Дагъустандин Докъузпара райондин Кара Куьре (КIеле Куьре) хуьруьн Х-ХI виш йисарин къадим мискIин цIай кьуна кайила ина цIийи мискIин эцигун кьетIнай. Ада куьруь вахтунда хуьре вичин къимет 3 миллион доллар тир гзаф иер мискIин эцигиз туна.
Гьа са вахтунда меценатди хуьре ял ядай къулай чка, ким туькIуьрна. Хуьре авай ижтимаи ва гьукуматдин вири дараматар цIийи кьилелай эцигиз туна. Меценатдин къайгъударвилин нетижа яз цин чIехи гьамбарханаяр эцигна, вири хуьруьнбурун кIвалериз хъвадай цин гунгарар тухванва. Хъсан патахъ кьиле физвай ихьтин дегишвилер ва къулайвилер акваз патаравай жегьилар хуьруьз хквезва.
Къадим кхьинар
Дербент шегьердин Керим Мамедбегован тIварцIихъ галай куьчеда чилин кIвалахар кьиле тухудайла техника къадим къванцин цлак галукьнава. Фялейри кIвалах акъвазарна алимриз хабар ганва.
Шегьердин къванцин вараривай 7 метр кьван яргъа тир чкадай, 4 метр дериндай винел къадим кхьинар алай плитаяр жагъанва.
Алимри гиман ийизвайвал, плитайрал алайди куфидин кхьинар я. Кьве къванцел «Аллагь» ва «Мугьаммад» гафар кхьенва. Алимри лугьузвайвал, арабрин куфи кхьинар виридалайни четиндиз кIелиз жедай кхьинар я. Ам ачухарун патал цIийи технологиядикай менфят къачуна кIанзава. Пешекаррин фикирдалди, кхьинар Дербентдихъ галаз алакъалу я ва ада шегьердикай цIийи делилар винел акъуддай мумкинвал гуда.
