Играми редакция! За и чар дуьшуьшдай кхьенвайди туш. И йикъара зун са лезги хуьре хьана. Заз адан тIвар кьаз кIанзавач. Чи чIехи ва къадим хуьрерикай я. Хуьруьн бязи чикIизвай кIвалер, чала-чухур квай рекьер, аявал техйизмай чкаяр акурла зи рикI тIар хьана. “Инсанри вучиз чпин хайи хуьруьн къайгъу чIугвазвач? Чпелай алакьдайвал вучиз рекьер авадан ийизвач?” – лугьуз фикирна за.
Са гафни авачиз, инсанрин игьтияжар къвердавай пара жезвай гилан девирда кьил хуьн са акьван регьят кар туш. Гъилиз мажиб къведай майишатдин кIвалах, хийирлу маса кар-кеспи, машгъулат тахьайла инсанри нагьакьан маса крариз кьил язва. КIвалах авачирвиляй гзафбур Урусатдихъ алатзава. Анани чи жемятдиз са масакIа килигзава. ГьакI хьайила, чна хуьрерин жегьилар чкайрал машгъуларуникай, абуруз кар-кеспидал машгъул жедай шартIар арадиз гъуникай фагьумна кIанзава.
Къайгъу чIугуртIа, чавай чи хуьрер чешнелу хуьрериз элкъуьриз жеда. Са мисал гъиз кIанзава. 2018-йисуз зун Дагъустан Республикадин Ахцегь райондин Луткун хуьре хьанай. Ана 4000-дав агакьна агьалияр яшамиш жезва. Гьукуматдин патай къайгъударвал тIимил яз акурла, хуьруьн агьалийри ва администрацияди чпин къуватдалди ина са кьадар крар кьиле тухвана, хуьруьн майишат кIвачел акьалдарна, клуб гуьнгуьна хтуна, жегьилриз спортдихъ галаз машгъул жедай шартIар арадиз гъана, медениятдинни яшайишдин месэлайрин къайгъу чIугуна. Са гафуналди, луткунвийри чпин кьилиз чара акуна.
Хуьруьн администрацияди, ветеранрин советди, клубдин, ктабханадин, мектебдин кIвалахдарри аялрихъни жегьилрихъ галаз ахлакьдин сергьятра хуьдай хьтин серенжемар кьиле тухузва. Гьа ихьтин крар себеб яз Луткунрал ахлакьдин, гъвечIи-чIехи чир хьунин, халкьдин хъсан адетар хуьнин, зегьметдал рикI хьунин жигьетдай чешнелу хуьр тIвар акьалтнава.
Ша чна луткунвийрин тежрибадикай менфят къачуна чи хуьрерин къайгъу чIугван. Абур жуван къуватралди чешнелу хуьрериз элкъурунин гьерекатдик кьил кутан. “Самур” газетди и месэладикай гегьеншдиз кхьенайтIа, чи рикIяй жедай. “Самурдин” “Чи хуьрер” рубрикадик кваз чапзавай макъалаяр гзаф марагълубур я. Гила “Чешнелу хуьр паталди” рубрикани кардик кутуртIа хъсан жедай.
