Дагъустандин кьил Сергей Меликован 2023-йисан 4-апрелдиз акъуднавай 80-нумрадин Указдалди, кӀвалахда агалкьунрай ва журналистикадин хиле гьакъисагъвилелди зегьмет чӀугунай “Лезги газетдин” кьилин редактор Мегьамед Ибрагьимован хва Ибрагьимоваз “Дагъустан Республикадин лайихлу журналист” лагьай гьуьрметдин тӀвар ганва.

М.И.Ибрагьимова “Лезги газетдиз” 2017-йисан январдин вацралай регьбервал гузва. И йисара газетдин редакцияда хъсан патахъ гзаф дегишвилер кьиле фенва. Спонсорар желб авуналди, республикадин газетринни журналрин дараматдин “Лезги газетдин” редакция авай мертебада ремонтдин кӀвалахар кьиле тухванва, газетдин тарихдиз талукь музей, редакцияда лезги эдебиятдин махсус ктабхана арадал гъанва, “Халкьдин кимел”, “Лезги чӀалан ктабар”, “Лезги чӀалай онлайн-курсар” проектар кьилиз акъуднава. “Лезги газетдин” редакцияди гьар йисуз “Леки” фондунихъ галаз санал Магьачкъаладин, Каспийскдин ва Кьиблепатан Дагьустандин шегьерринни районрин мектебра кӀелзавай аялрин арада лезги чӀалай олимпиадаяр ва маса мярекатар кьиле тухузва. Вири и крарик М.Ибрагьимован лайихлу пай ква.

Къенин юкьуз “Лезги газет” тираждал ва газетдин сайтдиз йикъан къене гьахьзавай инсанрин кьадардал гьалтайла, Дагъустандин милли чӀаларал акъатзавай газетрин арада сад лагьай чкадал ала.

КӀвалахда агалкьунрай М.И.Ибрагьимов виликдай РД-дин Кьилин, РД-дин Гьукуматдин Разивилин чарариз лайихлу хьана. Ам гьакӀни Дагъустандин халкьдин шаир Юсуп Хаппалаеван ва лезги публицистикадин хиле арадал гъанвай, Рамил Микаилован тӀварунихъ галай премийрин лауреат я.

Къейд ийин хьи, “Дагъустан Республикадин лайихлу журналист” тӀвар цӀийиз арадал гъанва ва М.Ибрагьимов лезгийрикай и тӀварцӀиз лайихлу хьанвай сад лагьайди я.