«Səssiz haray» ekranlara çıxır

İnsan mənəviyyatı problemlərinə həsr olunan, dərin psixoloji məqamları, həssas anları ilə diqqət çəkən “Səssiz haray” real hadisələr əsasında ekranlaşdırılmış bədii filmdir. Onun ssenari müəllifi və quruluşçu rejissoru Sədaqət Kərimova, quruluşçu operatoru Elxan Rüstəmov, rəssamı Sevda Məmmədovadır. “Soyuq günəş” və “İtən gündəlik” filmlərində olduğu kimi, bu filmin də bəstəkarı Sədaqət Kərimovadır.

Baş rollarda Azərbaycanın tanınmış aktyorları İlhamə Əhmədova, Aygün Fətullayeva, Elşən Rüstəmov, Ədalət Abdulsəməd, Mirzə Ağabəyli, Zemfira Abdulsəməd, Qəmər Məmmədova, Dilarə Fərəcullayeva, Elçin Əfəndi, Zümrüd Qasımova, Fariz İlyas və başqaları çəkilmişlər. Qusarlı uşaqların yaxından iştirakı filmə xüsusi kolorit qatmışdır. Onların arasında Arsen Abbasov, Əminə Sadirova, Qasim Aslanov, Əlimurad Əlimuradov, Vadim Kərimov və başqaları vardır.

Filmdə həvəskar aktyorlardan Cavid Tahirov, Rasim Bəkərov, Nüşabə Xələfova, Züleyxa Əhmədova, Elmara Hacıkərimova, Mənsurə Xeyirova, Nəzifə Qaflanova, Alimə Novruzova da çəkilmişlər.

Əksər çəkilişlər Qusar Peşə Liseyində aparılmış, onun direktoru İmaməddin Zəkiyev yaradıcı heyət üçün normal iş şəraiti yaratmaqdan ötrü əlindən gələni əsirgəməmişdir. Çəkilişlərdə liseyin kollektivi, o cümlədən müxtəlif yaşlı qusarlı məktəblilər yaxından iştirak etmişlər.

“Səssiz haray” bədii filminin qala gecəsi mayın 11-də saat 19:00-da Nizami kinoteatrında keçiriləcək. Filmin nümayişi 12, 13, 14, 15, 16, 17 may tarixlərində baş tutacaq. Biletlər mayın 12-dən etibarən kinoteatrın kassasında satılacaq.