2023-йисуз Урусатди тIвар-ван авай гьикаятчи, таржумачи, публицист, вичин девирдин лайихлу векил, Дагъустандин халкьдин шаир Расул Гьамзатован 100 йис къейд ийида. Алай йисан 1-мартдиз гьукуматдин патай «Расул Гьамзатован йис» ачухарна.

Шаирдин юбилейдихъ авсиятда фестивалар, концертар, выставкаяр, илимдин конференцияр, эдебиятдин нянияр кьиле тухун къарардиз къачунва. 2023-2025-йисара санал мярекатар тухунин пландив кьадайвал, Азербайжандани юбилейдин мярекатар кьиле тухуда.

Расул Гьамзатова медениятдин рекьяй Урусатдинни Азербайжандин алакъаяр вилик тухуник пай кутуна. Ада кхьенай: «Зи халкь гзаф месэлайрал гьалтайла Азербайжандихъ галаз алакъалу я – тарих, меденият, адетар ва майишат. Гьеле жаван вахтунда за Азербайжандиз жуван кIанивал, разивал къалурзавай шиир кхьенай». Ада Азербайжандикай са кьадар шиирар теснифнава. Р.Гьамзатов Азербайжандин тIвар-ван авай къелемэгьлийрикай Самед Вургъунахъ, Сулейман Рустамахъ, Мирзе Ибрагьимовахъ, Иляс Эфендиевахъ, Неби Хезридихъ, Тофикъ Байрамахъ галаз дуст тир.

Расул Гьамзатован поэзияди медениятдин битав са девир тешкилзава. Дуьньядин гзаф чIаларал адан цIудралди поэзиядин, гьикаятдин, публицистикадин ктабар чапдай акъатнава.

Эдебиятдин рекьяй Расул Гьамзатован алакьунриз зурба къимет ганва. Ада шумудни са гьуьрметдин тIварар ва премияр къачуна. Ам Дагъустандин халкьдин шаир, Социализмдин Зегьметдин Игит, Ленинан тIварунихъ галай премиядин лауреат, СССР-дин ва РСФСР-дин гьукуматдин премийрин лауреат тир. Расул Гьамзатова дуьньядин халкьариз талукь тир «ХХ виш йисарин вирилайни хъсан шаир» премияни къачуна.