Къуба райондин лезги ва къирицI хуьрера тарихдин цIийи гелер винел акъатнава.  Дигагь хуьруьн сурар авай чкада чилин кIвалахар кьиле тухудайла са кьадар деринда вичин гьяркьуьвал 80 сантиметр тир къадим цал авайди чир хьанва. Цал вацIун къванерикайни канвай кирпичрикай эцигнавайди я. Идалай гъейри анай хъенчIин къапар ва регъуьн къванерни жагъанва. Хуьруьн агьалийри лугьузвайвал, са шумуд йисар инлай вилик гьа чкадай къадим девиррин ракьун пулар ва жуьреба жуьре хъенчIин къапарни жагъанай.

КъирицI хуьряйни къадим сурар ва чепедин кьетIен жуьредин къапар жагъанва. И затIар хуьруьн модул мектеб эцигзавай чкада винел акъатнава. Археологри лугьузвайвал, къапар ва сурар ХI-ХII виш йисариз талукьбур я.