1990-йисан 20-январдин юкъуз Бакуда кьиле фейи мусибатдин 33 йис я. Гьар йисуз вири Азербайжандин, гьакIни къецепатан уьлквейрин агьалийри и югъ рикIел хкиз гегьеншдиз къейд ийизва. Гьам чи уьлкведа, гьамни къецепата кьиле физвай мярекатрал вири са фикирдал ала: Вичин азадвал патал женг чIугвазвай халкь муьтIуьгъариз кIанз Бакудиз атай Советрин кьушунди агьалийриз кьур дуван садрани рикIелай фидач. А юкъуз яракьлу къуватри гайи басрухар себеб яз Бакуда ва республикадин чара-чара районра 147 кас кьенай, 638 касдал хирер хьанай, 841 кас дустагъда тунай. Советрин аскерри 200 кIвал, 80 машин кукIварнай, агьалийрихъ лугьуз тежедай кьван чIехи зарар хкIурнай.
Халкьдин кьилел ихьтин мусибатар гъанатIани, и кар кьур ксариз жаза ганачир. Тарихда Совет империяди Азербайжан халкьдиз басрух гайи, ивияр экъичай югъ хьиз гьатнавай 20-январдин вакъиаяр халкьди садрани рикIелай ракъурдач.
