Чи эдебиятдин тарихда халкьдихъ дамах кутадай йисар тIимил авач. Абурукай сад 1983-йис я. Гьа йисуз лезги шаирринни кхьирагрин эсерар СССР-дин халкьарин 34 чIалаз – урус, украин, беларус, къазах, уьзбек, азербайжан, татар, авар, башкир, каракалпак, къиргъиз ва маса чIалариз элкъуьрнай. И таржумаяр цIудралди газетрин, журналрин, альманахрин чинриз акъуднай.

Гьа йисуз Каракалпакиядинни лезгийрин къелемэгьлийрин арада иллаки сих алакъаяр арадал атанай. «Каракалпакиядин правда» газетди 10-дав агакьна лезги шаиррин шиирар, гьакIни чи машгьур алим Гьажи Гашарова Алирза Саидовакай кхьей макъала чапнай. «Смена» тIвар алаз каракалпак чIалал акъатзавай газетдин кьуд нумрадиз Межид Гьажиеван «Зун, кешиш ва къарпуз» тIвар алай повесть акъуднай. Ина кьилди «Дагъустандин антология», гьакIни СтIал Сулейманан, Хуьруьг Тагьиран, Шагь-Эмир Мурадован, Ибрагьим Гьуьсейнован, Алирза Саидован, Ханбиче Хаметовадин, Байрам Салимован, Жамидинан ва Абдул Ражабован шииррикай туькIуьрнавай кьилди ктаб чапдай акъуднай.

И мукьвара Каракалпакиядин Кхьирагрин КIватIалди эдебиятдин рекьяй Дагъустандин, гьакIни лезгийрин къелемэгьлийрихъ галаз дуствилин алакъаяр цIийи кьилелай арадиз хкун, «Эдебиятрин дуствилер» тIвар гана мярекат кьиле тухун къарардиз къачунва.