Дагъустан Республикадин кьил С.Меликован серенжемдалди чи халкьдин тIвар-ван авай кьве шаирдиз – Сажидин Саидгьасановаз ва Фейзудин Нагъиеваз «Дагъустандин халкьдин шаир» тIварар ганва.

САЖИДИН САИДГЬАСАНОВ

Халкьдин поэзиядал гзаф рикI алай, вичихъ ргазвай илгьам авай, шиирар хуралай кIелдай, гьар са дуьшуьшдиз, гьар са вакъиадиз гьасятда чIалар туькIуьрдай алакьунрин иеси яз садбуру вичиз «Чи аямдин СтIал Сулейман» лугьузвай Сажидин Саиджамалан хва Саидгьасанов чи халкьдин рикI алай шаир я. Акунрайни, къилихрайни викIегь кас яз, лезги медениятда, шииратда вичин кьетIен чка кьунвай, чIалан гьуьжетунра гзафбур галудиз алакьдай, гъиле датIана къелем авай Сажидин муаллим рикIин экв чиниз хъичирнавайбурукай я.

Сажидин Саидгьасанован къелемдикай цlудралди шииррин, гьикаятдин, тарихдин ктабар хкатна. Адан «Вун накь вучиз атаначир?», «КIватIи-КІватІаш», «Аламатар», «Ни гуда заз жавабар», «Зуьрнедин ван алаз», «Риваятрин камари», «Шииратдин ялавар», «Зи СтIал Сулейман», «Куьн патал, чан аялар», «Ярагъви ашукь Уьзден» ктабар гъилерай-гъилериз физва.

ФЕЙЗУДИН НАГЪИЕВ

Чи халкьдин баркаллу хва, тIвар-ван авай шаир, прозаик, публицист, эдебиятдин пешекар, таржумачи, филологиядин илимрин доктор, ДГУ-дин профессор Фейзудин Рамазанан хва Нагъиеван (Фаиз Куьреви) къелемдикай хкатнавай эсерри чи руьгьдин ивирар девлетлу авунвайвиляй, ада халкьдин патай чIехи муьгьуьббат къазанмишнава. Адан шиирарни поэмаяр, гьикаяярни повестар, шииррин риваятарни драмаяр, гьакIни лезги чIалан илимдиз, эдебиятдиз, фольклордиз, чи классикриз талукьарнавай илимдинни публицистикадин макъалаяр чпихъ чIехи мас авайбур я. Вичин уьмуьр кьиляй-кьилди халкьдиз къуллугъ авуниз серфнавай ам кIелдайбурун рикI алай сеняткар я.

Къелемэгьлидин «Капал кхьинар», «Къванцел биришар», «Хважамжамни Яргъируш», «Цавай къвазва муьгьуьббатдин авазар», «Алпандин суракьда», «Терсепулда йиф», «Гарал теменар», «Къуруш», «Куьре Мелик», «Зенг ва къван», «Абилейсан марф», «Йиферивай хабар яхъ» ва маса шиирринни прозадин ктабар кIелдайбуру чIехи муьгьуьббатдивди кьабулнава.

«Самур» газетдин редакциядин коллективди Сажидин Саидгьасановаз ва Фейзудин Нагъиеваз «Дагъустандин халкьдин шаир» тIварар рикIин сидкьидай мубаракзава, абуруз чIехи агалкьунар тIалабзава.