Алай йисан гатуз Дагъустан Республикадин Кьурагь райондин КIирийрин хуьре къацу суварин ценерив гвай, гьар жуьредин къулай шартIар авай интернатдин дараматда лезги аялар патал «Лекьрен муг» тlвар ганвай этно-лагерь арадал гъида. Ана ял ягъидай аялар патал гзаф марагълу программа туькlуьрнава.

Муаллимрин регьбервилик кваз аялриз агъадик галай хилерай чирвилер къачудай мумкинвилер жеда: Лезги чIал, халкьдин адетар ва тарих чирун; балкIанар гьалун; чIемерукрай ягъин; дагълариз акьахун; спортдин акъажунрив эгечlун; музейриз ва тIебиатдин иер пипlериз сиягьат авун; лезги халкьдин тIвар-ван авай векилрихъ галаз гуьруьшар кьиле тухун. Лагердиз Дагъустандай, Урусатдин регионрай, гьакlни къецепатан уьлквейрай 8-15 яшарин рушарни гадаяр къведа.

Путёвкадин къимет 14 йикъан патал 28000 рубль, 20 йикъан патал 40000 рубль я.

И зурба проектдин кьил вич датlана лезги аялрин къайгъудихъ квай, абурун рикlера дидед чlалаз кlанивал цlириз тазвай чи ватанэгьли Садикь Гьасанов я. И къени кардик ФЛНКА-ди, «Леки» фондуни, «Лезги газетдин» редакцияди, гьакlни чи вилик-кьилик квай маса ксари къуьн кутада.