1948-йисан 25-июлдиз Къуба райондин Дигагь хуьре дидедиз хьайи Муьзеффер Низам ва Эсмер Меликмамедоврин 9 аялдикай вад лагьайди я. Къубадин интернат мектеб тафаватлувилелди акьалтIарай, вичин мурад журналист хьун тир жегьил КцIар райондин «Къизил Къусар» газетдин редакцияда кIвалахал акъвазнай.
Кхьинрал рикl алай жегьил аскервиле Ленинграддин военный мухбиррин мектебдиз кIелиз ракъурнай. «Советский моряк» ва «Красная звезда» газетра адан гзаф макъалаяр чап хьанай.
Университетдин журналистикадин факультетда кIелдайла Жафер Жаббарлыдин тIварунихъ галай стипендиядиз лайих хьайи жегьилди анаг яру дипломдалди акьалтIарна. Азербайжандин гьукуматдин «Совет кенди» газетда 17 йисуз отделдиз регьбервал гайи адакай республикадин тIвар-ван авай журналист хьана. Шиирралди кхьей хци фельетонри ам вириниз сейли авуна.
Гуьгъуьнлай «Гьеят», «Берекат», «Алпан» газетра кIвалахна, 9000-далай гзаф макъалаяр чапдай акъудна. Ам 2 медалдиз, Азербайжандин Журналистрин Союздин «Къизилдин къелем» премиядиз лайих хьана. Шаирдин уьмуьрдин рехъ ва яратмишунар Дагъустандин юкьван мектебрани институтра чирзава.
«Самур» газетди Муьзеффер Меликмамедован уьмуьрда кьетIен чка кьаз-ва. Ина редактордин заместителвиле кIвалахзавай 26 йисан къене ада чи тарихдиз талукь вишералди макъалаяр чапдай акъудна, сифте яз къадим чешмейрай 30-дав агакьна халкьдин къагьриманар, 40-дав агакьна шаирар винел акъудна.
1918-йисуз эрмени дашнакри ва большевикри Къуба уезддал вегьейла абурун аксина кьегьалвилелди женг чIугур кцIарвийрин къагьриманвилерикай гегьеншдиз кхьена. И женгериз регьбервал гайи Муьгьуьбали эфенди, Гьатем агъа хьтин кьегьалар халкьдиз чирна.
Къелемэгьлиди ХIХ ва ХХ асирра Къуба уездда кьиле фейи вакъиайрин бинедаллаз лезги чIалал «Къубадин гъулгъула» ва азербайжан чIалал «Къанлу дере» ктабар кIелдайбурув агакьарна.
Муьзеффер Меликмамедов лезги, азербайжан ва урус чIаларал чапдай акъуднавай 28 ктабдин автор я. Ам азербайжан чIалал кхьенвай «Йифен экв», «Хачмази гъалибвилин рехъ хуьзва», «Полковникдин кьин» ктабрай Азербайжандин «Араз» премиядиз лайих хьана. «Лезги тIвар алатIа...» ктабдалди ада сифте яз лезги эдебиятдиз эссе жанр гъана. И ктабдай Дагъустандин «Куьредин ярар» медениятдин меркезди адаз «Лезги халкьдин къагьриман хва» гьуьрметдин тIвар гана.
Бакуда басма хьайи «Беневша хьиз экъечIда» ктабдалди Муьзеффера кIелдайбуруз чи поэзиядиз вичихъ кьетIен хатI авай ялавлу шаир атанвайди баянарна.
Гуьгъуьнлай «КIанидаз кьве виш мани», «Касар», «Эрекьистан» кIватIалар чапдай акъудай къелемэгьлиди лирикадин шиирар хьиз сатирадин эсерарни устадвилелди къелемдизкъачузвайди кIелдайбуруз субутна. Поэзиядин рекьяй Муьзеффер 2011-йисуз Дагъустан Республикадин «Шарвили» премиядиз лайих хьана.
Вичин машгьур «Гьажи Давуд» ктабдин винел М.Меликмамедова 27 йисуз кIвалахна. XVIII виш йисарин кьегьал лезги сердердин уьмуьрдикайни халкьдин азадвал патал тухвай женгерикай ихтилатзавай и ктаб арадиз гъун патал ада гзафни-гзаф тарихдин чешмейрикай ва архиврин документрикай менфят къачуна. 2012-йисуз и ктаб азербайжан чIалал Бакуда, 2016-йисуз урус чIалал Магьачкъалада чапдай акъудна.
Азербайжандинни Дагъустандин шегьеррани районра кьиле тухузвай чIалан мярекатра мукьувай иштиракзавай Муьзеффер Меликмамедов «Самур» газетдин коллективдихъ галаз санал чIалан михьивал, фасагьатлувал хуьн патал датIана женгина ава. Ада Седакъет Керимовадихъ галаз санал чапдай акъуднавай «Лезги чIаланни азербайжан чIалан гафарган» ва «Азербайжан чIаланни лезги чIалан гафарган» ктабарни и женгинин давам я.
КIелдайбуруз Муьзеффер Меликмамедован чIалан илимдин чара-чара хилериз талукьарнавай 150-дав агакьна макъалаяр малум я. Ада вичин «Лезги чIалар» монография чи ономастикадин, лексикадин, этимологиядин ва диалектологиядин кьетIен месэлайриз талукьарнава.
