Гьерекат кьиле физвай гьалар, саягъар ва тегьер къалурзавай гафариз наречияр лугьуда. Наречиди гьикI? гьи саягъда? мус ? гьина? ва ихьтин маса суалриз жаваб гуда. Месела: кIевиз, хъсандаказ, накь, къецел, мекьила, чIангьакьа наречияр я.

   Наречийрин чIехи пай суффиксри арадиз гъанвай гафар я. Гзафни-гзаф наречияр прилагательнийрин, существительнийрин, са кьадарбур наречийрин ва числительнийрин дибрикай, тIварцIиэвезрикай арадиз къведа.

   1. Прилагательнийрин дибрикай наречияр ихьтин суффиксри арадиз гъида:
-з: чIехиз, хъсанз, мекьиз, кичIез, кIевиз;
-диз: иердиз, текдиз, жуфтдиз, ачухдиз, хъсандиз;
-даказ: михьидаказ, хцидаказ, пехъидаказ, векъидаказ;
-кIа: чIурукIа, цIийикIа, масакIа, къеникIа;
-ла: регъуьла, кичIела, чимила, мекьила;
-ба (-эба ): терсеба, эквеба, чинеба;

   2. Существительнийрин дибрикай ихьтин суффиксри:
-ди: кьилди, рехъди, йифди, кьуьдди;
-з: нисиниз, пакамаз, няниз;
-из, -уз, -уьз: йифиз, юкъуз, гатуз, хъуьтIуьз
-хъ, -ихъ, -ухъ: пакамахъ, рагъдандихъ, нянихъ, зулухъ;
-дай, -далди, -дивди, -яй ва мсб.: эвелдай, кьасухдай, ашкъидалди, мукьуфдивди, хъиляй, рикIяй;

   3. ТIварцIиэвезрин дибрикай ихьтин суффиксри:
-кI: икI, гьакI, акI, атIакI.
-на, -низ, -нихъ ва мсб.: ина, гьина? чина, ана, гьаниз. Саниз, инихъ, гьанихъ, гьинихъ? гьиниз ва мсб.
Наречийрин дибрикай ихьтин суффиксри:
-далди, -алай, -алди: къедалди, накьалай, шазалай, мусалай, мусалди? шазалди;

   5.Числительнийрин дибрикай ихьтин суффиксри:
-ра: цIудра, цIувадра, къадра.