Са береда КцIара ГьапIитI тIвар алай са кас яшамиш жезвай. УьцIвей кIвале ялгъуздаказ уьмуьр гьалзавай ам эрекьни чехир хъваз акатай чкадал ксудай. Вергерини эчIелри элкъуьрна кьунвай адан салахъ фадлай усун кумачир. Гъен гатуз руквада, зулуз хурхада жедай. Аялри и касдиз къван гудай, чIехибуруз ам такIандай. Усал, вижесуз, къеркъетI инсанрикай гаф кватайла адаз “ГьапIитI” лугьудай садбуру.
ГьапIитIан халисан тIвар вуж тиртIа гзафбуруз чидачир, чидайбуруни ам рикIелай ракъурнавай жеди. Явакъанвиливди къар гарув гузвай, кьилиз сер янвай рехи касдин тIвар гьа вичиз кутугайди тир.
Ингье чи бязи хуьрер акурла, ГьапIитI рикIел хкведа зи. Гьадан къеркъетIвилив гекъигда за а хуьрерин куьчеяр. Гилан гьапIитIар керкиди хьиз жувахъ ялдайбур я. Абурун кIвалер гуьнгуьна ава, къаварал дуьньядин вири каналар кьадай антеннаяр ала. Пуд юкI алай паруяр хкажнава и ксари. Анжах варарай къецик экъечIайла хъуртал алай хьиз жеда ваз. Паруяр вергерини цацари, рекьер хурхади кьунва.
И мукьвара КцIарин гьахьтин хуьрерикай сада машин хурхада акIана чи. Аялар хурхада гьатнавай. Куьчедай тIуз физвай дишегьлийринни итимрин кIвачин къапар акурла инсандин рикI тIар жедай.
- Чун авай гьалар аквазва ман квез, - лагьана чун илифарнавай миресди.
- Эхь, аквазва, - лагьана чна.
- Рекье къван, я чиргъ тван садан рикIелни къвезвач. Са кIвачин къапари пуд вацрани таб гузвач.
Къвалавай шуршур къачуз авахьзавай вацIуз вил вегьена за. ЧIехи, гъвечIи къванеривди ацIанвай вацIун кьер
- Квевай мел авуна жуван такьатралди и рекье къван тваз жезвачни? - жузуна за.
- Эгь, гила жемятар мелерив эгечIзамайди яни? - лагьана чи гафарикай хуш авачиз миресди.
- Куь хизанда ругуд кас ава. Квевай жуван кIвалин гъен хьайитIани гуьнгуьна хутаз жезвачни? Са гьафте вахт серфна зегьмет чIугуртIа, цIуд йисан къене куьн хурхадани жеч. Къуншийрини чешне къачуна и кардик кьил кутада.
Зи рикIел Европадин бязи уьлквейрин хуьрер хтана. Цанрин кьерехрай тIуз физвай рекьерни кваз асфальтдин рекьер я анра. Чпин кIвалихъ хьиз, магьледихъни, хуьруьхъни ялда а инсанри.
Са береда лезгиярни гьа икI тир. Инлай вилик кIвалер эцигдайла, цанар цадайла, гад гатадайла, саларинни багъларин раж кIватIдайла, са гафуналди, залан кIвалахар кьилиз акьуддайла къуншийри, мукьва-кьилийри кIапlал-кIапlал кIватI хьана мелер ийидай. И мелерикай виридалайни рикIел аламукьдайди рекье къван тван тир. Жемят гьукуматдал вил алаз акъваздачир. Арабайралди, фургъунралди, чпихъ мумкинвилер авай ксари машинралди вацIай къванер ялдай. УстIарвилин алакьунар авайбуру рекье къван твадай. Са шумуд юкьуз зегьмет чIугур элдин рехъ авадан жедай. Чи са кьадар хуьрера икI къван тунвай рекьер исятдани ама. Им михьивални я, медениятни.
Гила дегиш хьанва лезгияр. Пакагьан югъ фикир тийидай, анжах танни хук фикирдайбур фад-фад дуьшуьш жезва чал. Гьа и крарикай фагьумдайла ГьапIитI рикIел хкведа зи...
