Играми редакция! Куьне Самур вацIукай кхьенвайвиляй зи рикIел Самурдин тамар хтана. Вучиз лагьайтIа тIебиатди чаз бахшнавай и тай авачир хазина мад рикIелай ракъурнава. Са шумуд йис инлай вилик Самурдин тамарин месэла къарагъарайла гьам талукь идараяр, гьамни чкадин агьалияр са вуч ятIани ийиз алахънай. Ахпа вучиз ятIани вири крар гьафи-сафи хьана.

Зи рикел хъсандиз алама. 2014-йисуз «Планета хкатайрикай михьин» тIвар ганвай виридуьньядин акция кьиле фейи вахтунда инсанрин рикIел Самурдин тамарни хтанай. Хайи чилин таъсиб чIугун, адан къайгъудик хьун виридан буржи тирди чпин краралди субутиз алахъай лезги ватанпересри Самурдин тамарин къерехда экIя хьанвай яшайишдин ва ял ягъидай чкайрай 10 тонндилай гзаф хкатаяр кIватIнай. И кардик «Дагъустан» къурухдин ва «Газпромтрансгаз» ООО-дин кIвалахдаррини къуьн кутунай. Хтут, Билбил хуьрерин, Мегьарамадхуьруьн райондин Приморск поселокдин мектебрин аялри ва Самурдин тамариз гуьзчивал ийизвай инспекторрини михьивилин крара мукьувай иштиракнай.

КIвалахар кьилиз акъудайдалай гуьгъуьниз Приморск поселокдин аялри акциядин иштиракчийриз экология хуьнин важубливилиз талукьарнавай марагълу сегьнеяр къалурнай, «Газпромтрансгаз» ООО-дин кIвалахдарри суваб кар кьилиз акъудайбуруз савкьватар вуганай. Им лугьуз тежедай кьван хъсан мярекат тир. Гьайиф хьи, фад рикIелай алудна.

Алай вахтунда Самурдин тамариз генани мукьувай къайгъу къалурна кIанзава. Кайгъусузвилин нетижада 15 жуьредин гьайванар, 40 жуьредин къушар СССР-дин ва РСФСР-дин Яру ктабра гьатна. Самурдин тамарин майданар пудра тIимил хьана. Гьавиляй ина экологиядин жигьетдай гьалар хъсанарун патал вири жуьредин алахъунар авуна кIанзава. И ниятдалди заз «Самур» газетдин кьумекдалди жуван ватанэгьлийриз эвер гуз кIанзава: «Ша чна Самур вацIни Самурдин тамар хуьнин кардик къуьн кутан. Кваз такьуртIа, чи хайи чилер баянлухдиз элкъведа. ТIебиатдиз жуван дидедиз хьиз кьайгъу къалурин, хайибур!»