Играми редакция! Куьне 30 йисуз датIана халкь паталди гзафни-гзаф зегьметар чIугуна чи Кьулан вацIун тIвар алай «Самур» газет акъудна. Гила 31 лагьай йис я газет акъатиз. Лезги чIал хуьн патал женг чIугвазвай, халкьдиз руьгь хуьз куьмек гузвай, гьар са лезгидик дамах кутазвай газет. Чаз чизвайвал, 1997-йисалай газет акъудун чи тIвар-ван авай кьве журналистдин – Седакъет Керимовадин ва Муьзеффер Меликмамедован хиве гьатна. Чи къелемэгьлийри арадиз хкай газет метлублувилел гьалтайла гзаф зурбади хьана, ада халкьдин уьмуьрда чIехи роль къугъвана.
Гьайиф хьи, бязибуруз эхиримжи 25 йисуз кьилин редактор Седакъет Керимовади санхъайни куьмек авачиз вичин пулуналди газет гьикI акъуднатIа, редакциядал гьихьтин четинвилер дуьшуьш хьанатIа, коллективди гьихьтин азиятар чIугунатIа чизвач. Редакторди «Самурдин» 2022-йисан 20-декабрдин нумрадиз акъуднавай вичин «ДатIана женгина» макъалада кхьенвай гафари заз хьиз, маса кIелдайбурузни таъсир тавуна жеч: «И газетди зав гзаф дердер чIугваз туна. РикI тIарна ада зи. Газет вуч ятIа, ам кIелун вучиз герек ятIа чизвачирбур, ам кваз такьазвайбур акваз шерзум хьайи вахтунда вучиз садбурухъ лезги руьгь кумач лугьуз суал гана за жува жуваз».
РикI тIардай кар ам я хьи, садбуру уьмуьрдин ихьтин залан уламра газет вучиз акъудзавайди я, ам низ герек я лугьузва. Заз ихьтинбуруз атIай жаваб гуз кIанзава: Газет чи журналистри жуван халкьдал рикI алайвиляй, пешедал кьару тирвиляй, хайи чIал хуьн патал, халкьдин руьгь хкажун патал акъудзавайди я. Шумуд йисар я абур чи тарихар цIийи кьилелай чириз, адакай хабар авачирбур уяхриз, чи лезгивал гуьнгуьна хутаз, хайи халкь ла-йихлу чкадал хкиз алахъзава.
Ихьтин газетдиз куьмек тагун дуьз яни? Куьмек гузвач чпихъ мумкинвилер авай лезгийри газетдиз. Кьилин редакторди – са инсанди гьикьван текдиз пар ялда? Икьван гагьди вичин пулуналди газет акъудзавай адахъни мумкинвилер амач. «Самур» етим аял хьиз юкьвал аламукь тавурай лугьуз ам онлайн газетдиз элкъуьрнава редакторди. Газет и рекьив хуьз кIанзава коллективдиз. Чибуру гила хьайитIани газетдиз куьмек гудач жал? Онлайн газет акъудун регьят кар туш эхир. Адазни куьмекар гана кIанзавайди я. Са касди хьайитIани редакциядиз фена жузазвани, куьне вучзава, газет гьикI акъудзава? Чун газет халкьдиз ядни фу хьиз герек тирдан гъавурда жуванбур мус акьада?
