Играми редакция! Алай вахтунда Россиядин лезгияр гзаф яшамиш жезвай вилаятрикай сад Краснодар я. Кубанда чи ватанэгьлияр генани гзаф ава. Ина абурун бязи гъвечIи хуьрерни арадиз атанва. Гьеле къад йис инлай вилик Кубандин лезгийри туькIуьрай “Лезгияр” жемиятди маса регионрин медениятдин меркезриз чешне къалурзавай. Хайи чIал ва милли адетар хуьн патал и кIватIалди кьиле тухузвай крари вири вилаятдин лезгияр агудзавай. “Лезгияр” кIватIалдин регьбервилик кваз Динский райондин Нововеличковская станицада яшамиш жезвай чи ватанэгьлийри ина лезги мектеб, ансамбль ва “Жуванбур” тIвар ганвай клуб тешкилнай. А йисара Кубандин лезгийри 20-далай гзаф фермервилин майишатар арадиз гъанай. 
Гила и вилаятда 60 агъзур кьван лезгияр яшамиш жезва. Чи ватанэгьлийрикай гзафбур эцигунрални бизнесдал машгъул я. Бязи лезгийрихъ керпичрин  ва консервийрин хсуси заводар ава. Фермервилин майишатрин кьадар 30-далай гзаф хьанва. 
Са береда Кубанда “Лезгияр” кIватIал арадиз гъайи Ярагьмед Ярагьмедов, карчи ТIайиб Жафаров хьтин чи кьегьал ватанэгьлийрин рехъ давамарзавай лезгияр вилаят тирвал чкIанватIани, абуру датIана сад-садахъ галаз алакъа хуьзва. Чпихъ мумкинвилер авай ксари дарвал чIугвазвайбуруз куьмек гузва. РикI шадардай крарикай сад ам я хьи, чи бязи бизнесменри аялринни ветеранрин фондариз, ибадатханайриз куьмек гун чпин буржи яз гьисабзава ва и кардив мукьувай машгъул жезва. 
Кубандин лезгийри Яран сувар ва мехъерар иллаки гурлуз тухуда. Ина абурухъ кьилди “Мехъер” тIвар алай дарамат ава. Дараматда фад-фад шадвилин мярекатар кьиле фида. Чи мехъеррик ина яшамиш жезвай маса халкьарин векилрини мукьувай иштиракда. Абурунни лезгийрин арада мягькем дуствилин алакъаяр ава.