Алай йисан 18-ноябрдиз «Дербент кIвачел акьалт хъувун» тIвар ганвай хийирлу крарин фондуни Дербент шегьерда, Гьукуматдин Стlал Сулейманан тlварцlихъ галай лезги муздрамтеатрда шегьердин мектебра кlелзавай аялрин арада тIвар-ван авай шаир, гьикаятчи, драматург Седакъет Керимовадин «Чун лекьер я» шиир хъсандиз кlелунай конкурс кьиле тухвана.
Кьве гаф фондуникай. Ам арадиз гъанвайди Дагъустандин Халкьдин Собранидин депутат, машгьур меценат Имам Яралиев я. Фондуни тек са Дербент шегьерда ваъ, вири Кьиблепатан Дагъустанда гзаф хийирлу крарик кьил кутунва ва икьван гагьди вишералди инсанриз куьмекар ганва.
Фондуни чирвилер гунин рекьерайни гзаф кIвалахар кьиле тухузва. Ада Дагъустандин халкьарин милли медениятар, чIалар ва адетар хуьнин ва вилик тухунин кардик датIана къуьн кутазва. И йикъара кьиле фейи конкурсни ахьтин крариз мисал я.
Конкурсдин иштиракчийриз чlалан сувар мубарак авуналди, мярекат Лезги театрдин директор, жюридин кьил Динара Эминовади ачухна.
Ана 12 мектебдин 24 аялди иштиракна. Къейд ийиз кlанзава: конкурсдиз аялар муаллимри вижевайдиз гьазурнавай.
Аялрин алакьунриз къимет гузвай жюридик Лезги театрдин директор Динара Эминова, Лезги театрдин кьилин режиссер, РД-дин лайихлу артист Казбек Думаев, РД-дин искусствойрин лайихлу деятель, композитор, «Лезги газетдин» хсуси мухбир Къагьриман Ибрагьимов, Дербентдин педколлеждин лезги чlаланни эдебиятдин муаллимар Рагнета Алибегова ва Эльнара Шабанова квай.
Жюридиз хъсанбурун арадай лап хъсанбур хкягъиз пара четин хьана, гьикl лагьайтlа, саки вирида шиирар хуралай хъсандиз кlелнавай.
Къазанмишнавай баллриз килигна ихьтин нетижаяр хьана:1-чкадиз Муьгьуьдин Гьасанов ( Дуьньядин Медениятдин Гимназия , 7-синиф, муаллим Ж. Амаханова). 2-чкайриз Перис Исаева (11-нумрадин юкьван мектеб, 7-синиф, муаллим А. Жаватова) ва Амина Якубова (15-нумрадин юкьван мектеб, 7-синиф, муаллим Р. Алиева), 3-чкайриз Абдулла Исаев (11-нумрадин юкьван мектеб ,3-синиф, муаллим Н. Бабаева), Амир Наврузов (3-нумрадин юкьван мектеб, 6-синиф, муаллим Ш. Велиева) ва Фатима Яралиева (Дуьньядин Медениятдин Гимназия, 5-синиф, муаллим Т. Магьмудова) лайихлу хьана.
Кlвенкlвечи чкаяр кьур аялрив ва абур гьазурай муаллимрив гьар садав сад лагьай чкадай -15 агъзур манат, кьвед лагьай кьве чкадай –10 агъзур манат ва пуд лагьай 3-чкадай 7 агъзур манат пулар ва тарифдин чарар «Дербент кIвачел акьалт хъувун» хийирлу крарин фондунин крар кьилиз акъудзавай директор, шаир ва алим Азиз Мирзебегова вахкана. Тележурналист Мизамудин Магьмудова чкаяр кьур аялризни абурун муаллимриз Шарафутдин Фатуллаева цlийиз акъуд хъувунвай урус чlаланни лезги чlалан гафарган пишкешна. Гьакlни чкаяр тахьай вири аялрин муаллимрин зегьмет сертификатар гуналди къейдна.
Азиз Мирзебегова гьазурнавай мярекат тешкиллудаказ ва шад гьалара кьиле фена.
Виридаз къазанмишнавай агалкьунар рикlин сидкьидай мубаракрай!
