Тамила Хуршидова 1983-йисан 15-апрелдиз Ахцегь райондин Ухулрин хуьре Саидан хизанда дидедиз хьана. 1986-йисуз абурун хизан Мегьарамдхуьруьн райондин ЦIийи хуьруьз куьч хьана. Ина руш юкьван мектебдиз фена, ам 2000-йисуз акьалтIарна. Аял чIавалай шиирар теснифунал рикI алай рушаз кIелунар давамардай мумкинвал хьанач. Алай вахтунда пуд аялдин диде, кIвалин кайвани тир ам Бут-Къазмайрал яшамиш жезва.

Тамила Хуршидовадин шиирар ва куьруь гьикаяяр «Лезги газетда», «Самур» ва «Кард» журналра чап хьанва. Адан шиирар 2019-йисуз уртах «Илгьамдин булахар» ктабда гьатна. 2022-йисуз, жегьил шаирдин сифтегьан ктаб «Кварцин нур» тIвар алаз чапдай акъатна.

Кварцин нур

Багьавилиз килигначир Къубадин,

РикI акъудна къапар авай базардин,

Заз квайни-квай квар къачунай бубади,

Вичи лагьай кьимет гана заргардиз.

Вахтар фена, яд са кьадар авахьна,

Свасвилин квар куьгьне хьана пас кьуна.

А виликан нур амачир, хкахьна,

Налугьуди, пашман тир ам яс кьуна.

«ИкI тадач ам», – жува жував икьрарна,

Михьна за квар секуьл сумбатI жагъурна.

Мукьвал-мукьвал за и саягъ тикрарна,

За алемдиз зи кварцин нур къалурна.

Рахаз хьана, а кварцин нур эх тежез:

«Дишегьлидин квез я ихьтин кIвалахар,

Гьар камуна яхулвидиз мугьман жез,

Къеле ганвай кварцел ийиз дамахар?»

Ван тахьай гаф хьанач мад зи япариз.

Бед фитнейрин таъсирдик рикI тIар хьана.

Лугьузва за булахдаллай папариз:

– Яхулви туш, жув жуван устIар хьана.

Булахдиз

Руш тир чIавуз юрта хьана рехъ гатаз,

Гагь ракъини, гагь аязди хъвехъ гатаз.

Булах – багьна, ана маса кар авай

Яргъарилай заз килигиз, яр авай.

Свас хьайлани къариди зун, пIирел хьиз

Рекье твадай, хийир-дуьа мецел гъиз.

Варцелди кьван атана квар вугудай,

«Ирид хцин диде хьуй вун!» – лугьудай.

БачIах руш туш, я свасни туш дамахдин,

Кайвани яз яцIа авай кIвалахдин,

Киф чуьнуьхна кьил кутIунна бишмедал,

Къе атанва зун «Булахдин» чешмедал.

Зи азизбур, за квез салам лугьузва,

Эбеди яз дуствилин гъил вугузва.

Заз дуьа це, заз верги це, заз цIай це,

Куь камалдин хазинадай заз пай це.