Гьар йисан 10 – октябрдин югъ эхиримжи вахтара дуьньядин лезгияр паталди кьетIен йикъаз элкъвенва.
Гьа юкъуз дидед чIалал рикI алай чи ватанэгьлийри кIватI хьана санал диктант кхьида. Гьа идалди абурун рикIера авай ватанпересвилин, лезгивилин, жуввилин
гьиссер генани гужлуз раиж жеда.
РикI ахъайдай кар ам я хьи, санал диктант кхьин дидед чIалаз икрам авунин рекьерикай садаз элкъвенва. Чи ватан эгьлияр сад-садав агатзава, лезги чIалан гьаларикай веревирдер ийизва, ам хуьнин рекьерикай фагьумзава. И къени кардив сифте йикъалай шанкьунивди эгечIнавай Баку шегьерда акъатзавай “Cамур” газетдин редакциядин коллективди ва адан активди и гъилера мярекат РФ-дин Азербайжанда кардик квай “Русский дом” дараматда кьиле тухвана.
Газетдин редактор Седакъет Керимовадин регьбервилик кваз арадиз гъанвай мярекатдик и гъилера гзаф жегьилар экечIнавай. Гьа и карди Азербайжандин лезгийрин арада дидед чIалаз авай кIанивилин дережа къвердавай генани хкаж жезвайди къалурзава.
Чи зурба шаир СтIал Сулейманан 155- йисан юбилейдиз талукьарнавай дик- тант кхьейбурун арада чи тIвар-ван авай шаир-журналист Муьзеффер Меликмамедов, жегьил къелемэгьли- яр тир Азизрин Севда, Эфсер Абдуллаев, “Сувар” ансамблдин регьбер Завир Нежефов, Бакудин Пантомима театрдин актриса Сабина Гьажи- ева ва масабур авай. Виридалайни гъвечIи иштиракчи тир, VI синифда кIелзавай Абдулгьамид ва адан XI cинифда кIелзавай вах Селей На сруллаеври лагьайтIа, пуд лагьай йис я чахъ галаз санал диктант кхьиз. Чпини акьван рикI алаз кхьизвай хьи, и кардай абурун дидедиз – Азизрин Севдадиз баркалла къвезвай.
Кхьинар кьилиз акъатайдалай кьулухъ хайи чIал, жуван меденият, адетар, лезгивал хуьнин важиблувиликай кьиле фейи ихтилатри вирибурук руьгь кутуна, жегьилри лезги мярекатар жезмай кьван мукьвалмукьвал кьиле тухун тIалабна.