Алай йис тӀвар-ван авай лезги композитор, Азербайжандин ва Дагъустандин халкьдин артист Эльза Ибрагьимовадин 85 йисан юбилейдин йис хьиз кьилиз акъатзава. Чи республикада адан манийриз талукьарнавай цӀудралди концертар кьиле фена.

400-елай гзаф рикӀелай тефир манийрин, “Aфет” ва “Кузвай лайлаяр” тӀварар ганвай операйрин, пьесайрин, романcрин, фортепиано патал концертрин автор тир Эльза Ибрагьимова вириниз сейли я ва ам дуьньядин машгьур композиторрихъ галаз са жергеда ава.

Францияда 500 агъзур тираждалди Э.Ибрагьимовадин шикил алай маркаяр чапнава. Азербайжандин  Баку, Къуба, КцӀар,  Хачмаз, Гьажикъабул, Астара, Дагъустандин  Дербент ва Магьачкъала шегьерра куьчейриз композитордин тӀвар ганва.

Дагъустандин гьукуматдин тӀалабуналди композитордин 80 йисан юбилейдихъ авсиятда “Эльза Ибрагьимова” тӀвар алай гими раснай. Туьркияда залзала хьайи вахтунда а уьлкведиз гьа гимида аваз 10 агъзур тонндилай гзаф эцигунрин материалар тухванай.

Виридалайни рикӀел аламукьдай вакъиайрикай сад ам я хьи, Азербайжанди Шуша эрмени чапхунчийрикай азад авур вахтунда ана гъалибвилин гимн хьиз Э.Ибрагьимовадин  “Эй, Ватан!”  мани лагьанай.