Республикадин зурба сеняткар, классикадин гитарадин устад, Азербайжандин Харусенятдин Университетдин тlвар-ван авай муаллим, вичин 80 яшар хьанвай Элмар Султанова и мукьвара заз зенг авунай. Ам вичин студент Заур Мамедовакай рикI алаз раханай. Кьилди, гьакIни «Суьгьуьрлу симер» ансамблда гитара ягъизвай и жегьилдин алакьунрикайни агалкьунрикай заз гзаф чирвилер ганай.

Авайвал лагьайтIа, вичин суракьар чав агакьнавайтIани, Заурахъ галаз зун икьван гагьди  таниш тушир. Элмар муаллимди классикадин гитара ягъунай республикадин ва шумудни са къецепатан уьлквейрин конкурсра сад лагьай чка кьунвай Заурав къведайди авач лагьайла зак лувар акатнай.

16-июндиз чун Заур Мамедова Бакудин «Кирха» тIвар алай камерадинни  органдин музыкадин залда Рауль Гьуьсейнов ва Тунар Велизадедихъ галаз санал «Суьгьуьрлу симер» ансамблди гузвай концертдиз фенай.

Гьа юкъуз и жегьилдин сенятдал гьейран тир зал ацIай инсанрихъ галаз санал дуьньядин халкьарин мелодияяр руьгьдиз кужум хьанай зи. Гагь-гагь заз акl жезвай хьи, ада юзурзавайди гитарадин ругуд сим туш, вичин рикI я. Залда авайбуру вирида сад хьиз, нефес къачун тавуна адахъ яб акалзавай. Гьар макьамдилай кьулухъ зал капари юзурзавай. Заз им тахьана классикадин эсеррихъ чпин вири гьиссералди икl яб акалзавай инсанар акуначир. Руьгь кутадай, рикl хъуьтуьлардай, хвеши ийидай легьзеяр тир ибур.

Гуьгъуьнлай Заур «Самур» газетдин редакциядиз илифнай.  И къени къилихрин жегьилди лезги, азербайжан ва урус чlаларал фасагьатдиз рахуналди, гьакlни гитарадал ягъай иер макьамралди  чаз рикlелай тефир легьзеяр бахшнай.

Заур Арифан хва Мамедов 2000-йисуз Бакуда дидедиз хьана. Сабаил райондин 51-нумрадин юкьван мектеб ва Жевдет Гьажиеван тIварунихъ галай 3-нумрадин харусенятдин мектеб акьалтIарна, Азербайжандин Харусенятдин Университетда кlелай ада гьанин магистратурани куьтягьна.

Зауран буба Арифа гитарадал гзаф хъсандиз ягъизва. Хцин рикIе и алатдиз кIанивал кутурдини буба я. Университетда лагьайтlа, гададин устад Элмар Султанов хьана, ада и сенятдин сирер вичихъ чIехи алакьунар авай и жегьилдиз захавилелди чирна. Гила адан устадвилелди ягъун акурла хвешивиляй муаллимдин вилер ацIузва. Классикадин эсерар хьиз, халкьдин мелодияярни хъсандиз ягъизвай и жегьилдалди ада рикlяй дамахзава.

Зауран гитарадал ягъунал адан буба хьиз, вахар Багъдагуьл ва Айгуьнни гьейран я. Диде Весиле лагьайтlа, вичин хайи ватан тир Кцlарин Чlакlар хуьре гила вирибуруз гитарадин устаддин диде хьиз сейли хьанва.

Заура рикl алаз, галат тавуна гитарадин симер рахурзавай, чна лагьайтlа пагь атlана адахъ яб акалзавай.

Ахпа за Зауран рикIел «Кирхада» хьайи концерт хкана. Гзаф хъсан концерт тир лагьана, ингье ана са лезги мелодия ван тахьуни зи кьарай атIайди мецел гъана. КIвачерик звер кутадай, руьгь хкаждай, дуьньядиз сейли тир «Лезгинка» макьамни программадик хьанайтIа, вири шад жедай лагьана.

– Ихьтин са эсердик зи вилни гала. Ам куьне туькIуьрна зав вуганайтIа, хъсан жедай. За жуван репертуардик гьа мелодия кутадай. Са лезгиди хьиз жуван халкьдин макьам ягъун зи рикIяйни жедай, – лагьана жегьилди заз жаваб ганай.

И гафарилай кьулухъ вуч лугьуз жеда кьван? Гаф гунилай гъейри чара амукьнач заз. И кар рикI алаз, кIанз-кIанз кьилиз акъудиз алахъда зун. Заура классикадин гитарадал а эсер вини дережада аваз ягъидайдан чIалахъ я зун.

Гьа юкъуз чун Заурахъ галаз гзаф затIарикай рахана. Халкьдин мелодияйра халкьдин руьгь авайдакай, ам гележег несилрал агакьарунин важиблувиликай, дидедин чIал хьиз и макьамарни вилин нинияр хьиз хвена кIанзавайдакай санал веревирдер авуна. И умун жегьилдин дуьньякьатIунри, савадлувили, зегьметдал рикI хьуни мад гъилера гьейранарна зун. Са йикъалай аскервилиз рекье гьатзавай и лезги жегьилдин рикIе авай мурадар кьилиз акъатун патал чна Заураз генани чlехи агалкьунар тlалабна. Адан хъсан суракьар яргъарай къведайдан, вичин сенятдив гзаф рикlер рам ийидайдан чlалахъ яз адавай чара хьана чун. Шегьре рекьиз экъечl, Заур!