ГьикI чир хьанай?

   Сулеймана садни авачир яргъал тама кIарасар хазвай. Садлагьана адан патав гвай валарал ацукьай билбилди манийрал илигна. Шаирди гъил хвена. Бармак пелез хкажна адахъ яб акализ гатIумна. Билбилди акьван иердиз манияр лугьузвай хьи, вири дуьнья рикIелай алатнавай Сулеймана  гьейранвилелди адахъ яб акалзавай. Вичи яргъал тама чинеба кIарасар хазвайди адан рикIел аламачир. И кар садлагьана акъатай векъи гьараюни адан рикIел хкана. Пата-къерехдиз вил вегьейла адаз тамухъан акуна.
– Тс-с! – лагьана Сулеймана. – Вуна билбилдиз кичIерарда.
– Я халу! – мад гьарайна тамухъанди. - Ваз жув гьина аватIа чизвани?
– За ваз вуч лугьун мирес, чун яргъал тама ава.
– Вуна закай рахшандзавани, зав гице жуван якIв, - лагьана тамухъанди.
– Зегьмет чIугвамир, мирес, - жаваб гана Сулеймана. – КIарасар за жува хада. 
– За ваз якIв зав гице лагьана. 
– Эгер ваз куьмек гуз кIанзаватIа, кIарасар за хада, вуна абур тамай акъуд. 
Тамухъан и яшлу итимдин гафарилай шаклу хьана. Ада кьуьзек са низ ятIани ухшарарна. Ахпа хъуьтуьл ванцелди жузуна:
– Зи вилик галайди шаир Сулейман яни, халу? 
– Валлагь мирес, пакамахъ зун кIваляй шаир Сулейман яз акъатнай ва инсанри гуьрметдивди заз икрам ийизвай. Гила зун са куьнини гъавурда акьазвач.
Сулейман гьакъикъатдани вириниз сейли тир ва яргъал тамани ам чир хьанай. Тамухъанди адавай вичин тахсирдилай гъил къачун тавакъу авунай ва кIарасар хаз куьмек гана, шаир кIвале кьван рекье тунай.

Жузун-качузун

   Сулейманан дуст Гьажимурада адаз пишкеш яз са дана ганвай. Йифиз шаирди ам багъда са тарал кутIунна. Ингье пакамахъ Сулейманаз багъдай анжах еб жагъана. 
Рехъди физвайбурувай дана хабар кьаз-кьаз ада кимел тади къачуна. Рекье шаирдал Кьасумхуьруьз физвай Абдурагьман гьалтна. 
– Пакаман хийирар хьурай. Сулейман, - лагьана ада. – Ви кефияр гьикI я? 
– Аллагьдиз шукур хьурай, хъсан я, – жаваб гана шаирди.
– Аялар гьикI я? Начагъ туш хьи? 
– ЧIехи жезва. Начагъ жезвач. 
– Ви къаридин кефияр гьикI я? 
Абдурагьмана яргъалди жузун -качузун ийизвай ва гуьгъуьнлай Сулейманани гьа икI авуна кIанзавай. Амма адавай эхиз тахьана лагьана:
– Заз килиг, Абдурагьман, дана квахьнавайди кваз такьуртIа, чи вири кIвалахар къайдада ава. Вун геж жемир, жуван рехъди вач, зани дана жагъурин.
 
Иеси кIанзавани?

   ГьикI ятIани ашукь Рагьим Сулейманан кьилив атана. Игьтиятлувал хуьзвай ада гьаятдиз вил вегьена шаирдивай жузуна: 
– Сулейман, ваз кицI авани?
– Ваз вуж герекзава? – жузуна Сулеймана. – Эгер вун кицIин кьилив атанватIа, ангье адан демек. Эгер зи кьилив атанватIа, ша, илиф кIвализ.

Минтикь

   Садра Сулейман хуьруьн виридалайни минтикь итим тир Абдурагьманахъ галаз санал кимелай хквезвай. Сулейманан марагълу ихтилатрик яб акалзавай минтикь вичин кIвалив агакьайла адаз шаирдикай чара жез кIан хьанач. Ингье ам акьван шкьакь итим тир хьи, Сулейманаз кIвализ теклифнач. Мискьи итимди сивик хъвер кваз лагьана:
– Сулейман, ша чун Беделан кIвализ фин, амай вахт гьана акъудин. 
Шаирди адаз секиндиз ихьтин жаваб гана: 
– Яб це, Абдурагьман, бес зун мус ви мугьман жеда? Якъин вун кучуддайдалай вилик зун ви кIвализ илифдай  хьтин туш.