Алай йисан 23-декабрдиз Россиядин Бакуда авай  «Русский дом» векилвилин идарада  Дагъустандин халкьдин шаир СтIал Сулейманан 155 йисан юбилейдихъ авсиятда манийринни шииратдин няни кьиле фена. Зал чIехи щаирдин, ХХ виш йисан  Гомеран портрет хранвай халичадив, адан надир шикилрив иердиз туькIуьрнавай.
   Мярекатда бакувийри, лезги ичтимаиятдин векилри, гьакIни Дагъустан Республикадин гьукуматдин патай атанвай мугьманри иштиракна. РикIиз хуш, къулай шартIара, гурлудаказ кьиле фейи мярекатдал Россиядин Азербайжанда авай посол Михаил Евдокимова, Дагъустан Республикадин Халкьдин Собранидин кьил Заур Аскендерова, Азербайжандин Милли Межлисдин депутат Полад Буьлбуьлогълуди ва масабуру СтIал Сулейманан уьмуьрдин рекьикайни яратмишунрикай рахана. Ахпа шаирдикай документрин бинедал алаз чIугунвай фильм къалурна.
   Дагъустандин Гьукуматдин Лезги Драмтеатрдин директор Динара Эминова кьиле аваз атанвай коллективди манийринни шииратдин композиция къалурна. Дагъустандин халкьдин артист Фаризат Зейналовади, ашукь Айдун Мегьамедова, театрдин артистар тир Гьемзебег Эмиралиева ва Рамик Рамазанова лезгидалди манияр лагьана ва шиирар кIелна.