Чи къелемдин дуст Бейбала Няметов рагьметдиз фена лагьай хабарди рикl тlарна чи. Залан начагъвиликай азият чlугвазвайтlани, ам икьван фад чавай къакъатдайди чи акьулдиз къвезвачир. Къени къилихрин, чина даим мили хъвер авай, инсанриз хъсанвилер авун адан рикIин мурад тир. КIвалахдин юлдашрин, къуншийрин, дустарин, хизандин рикI алай инсан тир ам. Чи журналист дустарин кьула Бейбала Няметовахъ вичин чка авай. 
1955-йисан 1-августдиз КцӀар райондин Ясаб хуьре дидедиз хьайи Бейбала Муьрселан хва Няметован уьмуьрдин гзаф йисар «Коммунист», гилан «Азербайжан» чапханадихъ галаз алакъалу хьана. Ам ина кӀвалахзавайбуруз вичинбурухъ ялдай инсан хьиз чидай. 
   Бейбала Няметован кьетIен-вилерикай садни ам кьакьан руьгьдин инсан хьунухь тир. ИкӀ хьаначиртӀа, адавай датӀана 46 йисуз «Бакинский рабочий» хьтин Азербайжандин тӀварван авай печатдин органда кӀвалахиз жечир. Ина чара-чара везифайрал кӀвалахай ада яргъал йисара жавабдар секретарвилин везифа кьилиз акъуднай. Журналистриз им редакциядин виридалайни четин ва жавабдар кӀвалах тирди хъсандиз чида. Газетдин акунар, ана гьи материалар гьи жуьреда, гьи макъалаяр гежел вегьин тавуна чапна кӀанзаватӀа жавабдар секретарди гьялда. И кар кьиле тухуз алакьай и кас, шаксуз, халисан пешекар тир.
   Бейбала чаз мукьваларнавай мадни са жигьет авай. «Самур» газет кIвачел акьалдай 1997-1998-йисара чи гъиликай кьур, чаз четинвилер арадай акъудиз куьмек гайи инсан тир ам.
Азербайжандин прессадин 140-йисан юбилейдихъ авсиятда Президентдин указдалди адаз «Медениятдин лайихлу кIвалахдар» гьуьрметдин тӀвар гана лагьай хабарди чаз гзафни-гзаф хвеши авунай. Гуьгъуьнлай ам «Терекъкъи» медалдиз лайих акунай. 
   Адан уьмуьрдин юлдаш Ханбажиди, рушари – Вефади, Севинжа, Сабинади Бейбаладиз эхиримжи кьуд йисан къене гьикӀ аявал авунатӀа чун шагьид я.  ДекӀени, вирибуруз рагьметлу Бейбаладин хьтин вафалу уьмуьрдин юлдашни акьуллу веледар кьисмет хьурай. Аллагьди абуруз сабур гурай! 
   Аллагьди рагьмет авурай ваз, хъсан инсан! Вун рикlелай алуддач чна! Женнет кьисмет хьурай ваз!