Алай йисан 25-декабрдиз лугьуз тежедай хьтин вакъиа кьиле фена. 67 кас аваз Бакудай Грозныдиз физвай самолетди мажбур яз Къазахстандин Актау шегьер галайнихъ лув гана ва анин аэропортдив агакьиз 3 километрдин рехъ амаз пад хьана. А вахтунда Азербайжан Республикадин Президент Илгьам Алиев СНГ-дин саммитда иштирак авун  патал Москвадиз физвай ва хабар агакьун кумазни ам кьулухъ элкъвена.
   Президентдин серенжемдалди гьасятда комиссия туькIуьрна Актаудиз рекье туна. Зарар чIугнавайбуруз куьмек гун патал герек тир крар кьилиз акъудна. Малум хьайивал, самолетда авайбурукай 42 кас Азербайжандин, 16 кас Россиядин, 6 инсан Къазахстандин ва 3 инсан Къиргъизистандин ватандашар тир. Санлай 38 кас гьелек хьана. Кьве пилотдини чпин дуьнья дегишарна. Самолетдиз Грозныдин аэропортда ацукьиз ижаза ганачир ва ам Актау галайнихъ фенай. Кьенвайбурун арада вичин 13 яшар тир бакуви Мегьамедали Еганов, жегьилар тир кцIарви вахни стха – Али ва Хедижа Алимирзоеварни ава.
   Республикадин Президентдин серенжемдалди алай йисан 26 - декабрь ясдин югъ яз малумарна ва агьалияр са декьикьа чукьни тавуна акъвазна. Бедбахт вакъиадин себебар тайинарун паталди кIвалах давамарзава.