Алкьвадар Гьасан-эфенди 1834-йисан 15-октябрдиз дидедиз хьана. Гзаф йисара Алкьвадар хуьруьн медресада кIелна. Ада вичин буба Гьажи Абдуллагь-эфендидивай, Гьажи Исмаил-эфендидивай ва Мирзе Алидивай тарсар къачуна.
Алкьвадар Гьасан-эфендиди араб, туьрк, фарс чIалар чирна, мусурман диндин рекьяй, философиядай, логикадай, математикадай ва маса илимрай гегьенш ва дерин чирвилер къачуна.
   Гуьгъуьнлай ада урус ва Дагъустандин бязи чIаларни чирна. КIелна куьтягьайдалай кьулухъ ада Куьредин хандин дуванханада секретарвиле кIвалахна. И къуллугъ Гьасаназ акьван хуш хьанач. Ада и кIвалахдикай икI лагьанай:
«Секиндиз медресада ктаб кIелиз вердиш хьанвай заз дуванханада кIвалахун кьадарсуз четин яз аквазна».
   Эхир ам вичин бубадин медресадиз хтана. Амма медресада кIвалах авун яргъал фенач. Урус пачагьдин гьукуматди Куьреда округ тешкилна. Алкьвадар Гьасан и округдин секретарвиле тайинарна. 1866-йисалай ада Кьиблепатан Табасарандин наибвиле кIвалахна.
   1877-йисуз Дагъустанда гьукуматдиз акси бунтар хьайила, ам кIвалахдилай алудна, дустагъ авуна. Ахпа ам Тамбов губерниядин Спасск шегьердиз кьуд йисан суьргуьндиз акъудна. Ам дустагъ авун ва суьргуьндиз ракъурунин себеб Алкьвадар Гьасанан и бунтара лежберрин тереф хуьн ва иштирак авун тир.
   Динэгьли тиртIани, ада Урусатдиз мукьва хьун ва адан культура чирун жуван халкь патал менфятлу тирди кьатIана ва хайи халкь уяхарун патал чIехи алахъунарни авуна.
Суьргуьндай хтайла, ада хуьре медресада тарсар гана, гуьгъуьнлай вичи мектеб ахъайна. Ана Гьасана тарихдай, философиядай, физикадай, урус чIалай тарсар гуз хьана.Ам илимдин кIвалахдални машгъул хьана.
   1890-йисалай кьулухъ Алкьвадар Гьасан-эфендидин яратмишунрин кIвалахдиз къвердавай гужлу жезвай урус культуради таъсир ийизва. И йисара ада «Асари Дагъустан» («Дагъустандин тарих») ва «Диван ал Мамнун» («Мамнунан ктаб») ктабaр кхьена.
   Сад лагьай ктабда ада къадим заманарилай вичин девирдал къведалди фарс, араб ва туьрк чIаларалди литературада Дагъустандикай авай малуматар ва делилар кIватIна, къайдадик кутуна. Кьвед лагьай ктабда Дагъустандин тарихдикай, культурадикай, литературадикай хейлин цIийи малуматар ганва. Кьве ктабни илимдин жигьетдай къенин юкъузни къиметлу я.
  Алкьвадар Гьасан-эфенди ди вичин девирдин газет ва журналрин кIвалахда иштиракна. Ам дуьньядикай хабардар кас хьана. Ада Египетда акъатзавай «Майет», Бакудай «Иршад», Бахчисарайдай «Тарджуман» газетар къачузвай.
Ада вичин девирдин алимрихъ галаз алакъаяр хуьзвай. Абурун арада яхулар Гь. Гузунов ва Зейд-эфенди, азербайжанвияр Гь.Зардаби, С. А. Ширвани, Н. Везиров ва мсб. авай.
   ЧIехи алим, шаир Алкьвадар Гьасан-эфенди 1910-йисуз рагьметдиз фейила Бакуда акъатзавай «Суьз» газетди кхьенай:
«Мусурманрин арада рaгьметлуди халис арифдар ва халкь Европа культурадихъ галаз мукьувай таниш хьунин терефдар хьиз машгъур тир... Ада мусурманрин вири прогрессивный печатдин органра сейливилелди иштиракна. Алим чи арадай акъатун мусурманриз чIехи бедбахтвал хьана».