Алатай асирдин 50-йисара цIудралди бендер туькIуьрай КцIар райондин Манкъулидхуьруьн эгьли Физеммедакай гзаф инсанриз чирвилер авач. Ам машгьур кас тир ва гьамиша хъсан крарихъ гелкъведай. Адахъ ярар-дустарни гзаф авай.

Хизан туькIуьрайдалай кьулухъ Физеммед гзаф йисара веледдихъ цIигел яз амукьнай. Эхирни Аллагьдиз адан дуьаяр ван хьана кесибдиз са гада велед гана. Гада чIехи хьайила вири адал гьейран хьана. Ам кьакьан буйдин, иер акунар авай, къуьнерал ирид юкI алай Мегьамед хьтин кьегьал тир. Садбуру Шарвили цIийи кьилелай дуьньядиз хтанва лугьузвай. Адахъ аламатдин гуж авай. Вичелай са шумудра залан къванер пешер хьиз чкадлай юзурдай. Пуд балкIандин фургъун са гъилив кьуна акъвазардай.

И гада гужлу тир кьванни акьуллу тир. Вич жегьил ятIани хуьруьнбуру адал меслят гъидай. Са кьадар вахтундилай гададин тариф къунши хуьреризни чикIана. Ингье йикъарикай са юкъуз гада вилиз атана. Экуьнахъ кIваляй са тIал-квални авачиз акъатай кьегьал нянихъ кIвализ хтайла рагьметдиз фена. Хайибуру кьил-мет гатаз цIугъна, къуншияр пагь атIана амукьна. «Ихьтин кьегьал сура гьикI твада?» – лагьана дидеди. «Ихьтин хва гъиляй акъатай завай дуьньядал яшамишиз жеч», – лагьана бубади.

Эхирни хуьруьн агъсакъалри санал кIватI хьана абуруз теселлияр гана, хайибур секинарна. Амма гада кучукдайла аламатдин кар хьана. Икьван гагьди вичин сивяй садаз са цIарни ван тахьай Физеммеда бендер лугьуз гатIунна:

Чаз сурарай са сур атIутI,

Куьлуь къван квай гуьнедикай.

Масан бала сура туна,

Зи пай атIуй дуьньядикай.

Гавдишандиз экъечIайла,

Агь алахьиз хьана зи рикI.

Чан гъафилдай кьейи бала,

Хажалатди кана зи рикI.

Физеммеда туькIуьрай ихьтин бендер садни-кьвед туш.Абур кIватI хъувуна халкьдив агакьарна кIанзава.