Яру дагъдин ценерив гвай са хуьре вирида сад хьиз гамишар хуьзвай. Гьар са хизандин ризкьи и гьайванрилай аслу тир. Къарилай са къуз Абдул тIвар алай са гададиз цурин цлакай куьрсарнавай къирмаж жагъана. Адаз дустариз вичин гьунар къалуриз кlан хьана, ингье абурукай садни патав гвачир. И чlавуз адаз сала векь незвай барцIак акуна. Къирмаждив гагь чил, гагь адан кlвачер ягъиз, вичивай хьайитlа гьайван рамзавай гадади. ГьикI ятIани къирмаж барцIакдин пеле акьуна. Адай ахьтин цlугъ акъатна хьи, кичlела Абдул пlинидин тарциз акьахна кис хьана.

  Садлагьана хуьре гъулгъула гьатна. Пехъи хьанвай гамишар чпин цуррин ракlарар хкудна къецел акъатна. Гьайванар Абдулрин кlарасдин варар чукlурна цIурзавай барцIакдин кьилив кlватl хьана. Гамишди вичин баладин иви физвай пелез мез гуз адаз чан-рикl ийизвай. Хъел акатай гьайванар гаф-чIал сад авуна хуьряй катна. Абуруз чпиз инадзавай инсанар такIан хьанвай.

  Гамишар амачиз инсанрин кьарай атIанвай. Абурун кар-кеспи, хизанрин ризкьи къакъаж хьанвай. Абдул аквадай вил авачир абуруз. Ам акурла чин элкъуьриз, такур кьасарзавай вирибуру. Вичи авур кардин заланвал кьатIай Абдула хуьряй катна фин кьетlна. Фидай чка тийижиз атана акъатна ам Яру дагъдин ценерив. Ина ам са кьуьзуь мегъуьн тарцин кlаник цIайлахъан авуна агалтна.

  Йифен кьулариз гададин япарихъ гамишрин ванер галукьна. Ам чкадилай хкадар хьана. Ван къвезвайнихъ килигайла адаз балаяр танарив кlевна, крчарив чпел вегьезвай ничхирар чукурзавай гамишар акуна. Кьуд жанавур гьарма санихъай абурал гьавалат хьанвай. Гамишри жанавурар крчарив хкажиз чилел гьалчзавайтlани абур сакlани алатзвачир.

  Абдула цIай квай са пая кьуна жанавуррал вегьена. Цlукай кичlела ничхирар гьармад санихъ катна. Кьуд пата секинвал гьатна. Гьайванри вирида Абдулаз килигзавай. Абдул вичи къирмаждив ягъай барцIакдив агатна, адан пелелай кап аладарна. Ахпа вичи цIайлахъан авунвай мегъуьн тар галайнихъ фена.

  Экуьнахъ ахварай аватайла адаз аламатдин кар акуна. Гамишри элкъуьрна ам юкьва тунвай. Гьайванриз вич хъфена кIанзавайди хьиз хьайи Абдул пашмандаказ рекье гьатна. Са герендилай элкъвена кьулухъ килигайла адан пагь атlана. Гамишар жерг яна гададин гуьгъуьнаваз къвезвай. Абур санал хуьруьз хтайла хуьруьнбурун хвешивилин и кьил, а кьил авачир. Эхь, писвални квахьдач, хъсанвални.