И йикъара чав чIулав хабар агакьна: залан азардикди Дагъустандилай къецени, Ленинград вилаятдани тIвар-ван авай педагог, филолог, шаир, таржумачи Гьасанова Гуьзеля Юзбеган руш рагьметдиз фена. Залан хабарди ам чидай вирибур къарсурна.

Гуьзеля Гьасанова 1960-йисан 16-ноябрдиз Мегьарамдхуьр райондин Тагьирхуьруьн Къазмайрал дидедиз хьана. Ада хуьруьн юкьван мектеб, Дагъустандин Гьукуматдин Педуниверситетдин филологиядин факультет яру дипломдалди акьалтIарна.

Кьисметди ам Ленинград вилаятдин Гатчина шегьердиз акъудна. Хайи ватандивай яргъа чкада лезги руша вичин вири къуватар шегьердин 2-нумрадин юкьван мектебда акьалтзавай несилриз урус чIалай ва эдебиятдай, виридуьньядин эдебиятдай, риторикадай чирвилер ва михьи ахлакьдин тербия гуниз бахшна. Ам кьилин дережадин муаллим, шегьердин мектебрин филологиядин муаллимрин кафедрадин регьбер, РФ-дин Президентдин грантдин сагьиб тир.

Гьеле мектебда амаз Г.Гьасановадин рикI шиирар теснифунал алай. Гьавиляй филологдин пеше хкянай. Адан лезги ва урус чIаларал кхьей шиирар жуьреба-жуьре газетризни журналриз акъатна. «Лезги газетдихъ» ва «Самур» газетдихъ галазни ада алакъа хвена. «Самур» газетди адан шиирар чапна, и ватанпересдин агалкьунрикай кIелдайбуруз малуматар гана. Шаирдин пуд ктаб – «Мулдин цуьквер», «Булахдин чешмедал», «Гьиссерин алемда» басма хьанва. Гьа са вахтунда ада чи авторрин эсерар лезги чIалай урус чIалаз таржума ийиз, шаиррин яратмишунриз къимет гуз, рецензияр, илимдин кIвалахар кхьизвай.

2016-йисуз Г.Гьасановади дуьньядин кьуд патаз чкIанвай ватанэгьлияр, иллаки яратмишзавай ксар санал агудна «Булах» кIватIал ва адан фонд арадал гъана. «Булахдик» къадалай гзаф ксар экечIна. Адахъ мадни къени ва хъсан мурадар, планар авай. Гуьзеля Гьасанова виридаз хъсан диде, вафалу юлдаш, жумарт дуст хьизни чидай.

Адан экуь къамат ам чидай инсанрин, гьакIни «Самурдин» кIелдайбурун рикIера эбеди яз амукьда.

Аллагьди рагьмет авурай!