Лезги халкьдин шаир Сажидин Саидгьасановахъ тек вичин хайи  район тир Кьасумхуьрел ваъ, гьакlни Дагъустанда, Россияда, Азербайжанда, идалай гъейри къецепатан уьлквейрани гзаф ярар-дустар ава, абурухъ галаз  алакъаяр хуьзва. Интернетда датlана вичин цlийи шиирар чапзавай, дуьньядикай веревирдер инсанрив агакьарзавай и камалэгьлидин кlвализ ам акваз кlанз фад-фад мугьманар илифда.

90 яшда вич Дагъустандин халкьдин шаир гьуьрметдин тIварцlиз лайихлу хьайи къелемэгьлидин юбилей районда гурлудаказ кьиле фенай.

А мярекатда иштиракиз тахьай са кьадар ватанэгьлийри гилалдини Сажидин муаллимдиз халкьдин шаирдин тlвар мубаракзава.

И йикъара Россиядин Хантымантийск автономиядин округдин жуьреба-жуьре шегьерра кIвалахзавай чи лезгийрин кIватIалрин векилар тир Абдуллаев Руслан, Тагиров Разир, Бейбалаев Муса ва Абдурзакьов Жалалудин Кьасумхуьрел атана агъсакъалдин кIвализ илифна. Абурухъ галаз санал райондин телевиденидин журналист Мизамудин ва оператор Мегьамедни атанай. Мугьманрал рикI алай шаирди абур вичин кlвале хушдиз кьабулна.

Вичин «кабинет» – кIвале гьикI кIвалахзаватIа къалурай ада багьа компьютерни рангадин принтер Имам Яралиеван «Умуд» тIвар алай фундуни пишкеш яз ганвайди я лагьана.

Гуьруьш видеодиз къачуна, Кьасумхуьруьн телевиденидай са шумудра гана.

Эхирдай шаирди мугьманриз вичин ктабар багъишна.